Mektepterge shetelden muǵalimderdi shaqyrtý tájirıbesi durys pa

ASTANA. KAZINFORM – Oqý-aǵartý mınıstri Ǵanı Beısembaev Nazarbaev zııatkerlik mektepterine shetelden muǵalimderdi shaqyrtý ne úshin kerek ekenin túsindirdi

Búgin Úkimet otyrysynan keıingi baspasóz máslıhatynda «ne sebepti Nazarbaev zııatkerlik mektepterinde sheteldik muǵalimderdiń jalaqysy jergilikti pedagogterden joǵary» ekeni suraldy.

Óz kezeginde Ǵ. Beısembaev bul jaǵdaı atalǵan mekteptiń ishki erejesine jáne qoıylǵan maqsattaryna sáıkes iske asyrylyp otyrǵanyn aıtty.

- Osy mektepterde ǵana emes, sonymen qatar basqa da halyqaralyq mektepterde, jekemenshik oqý oryndarynda mindetti túrde shetelden tıisti muǵalimderdi shaqyrtý arqyly keıbir pánderdi qosymsha oqytý turǵysynan mundaı tájirıbe bar. Olar barlyq pánder boıynsha jergilikti muǵalimderdi almastyryp otyrǵan joq, ıaǵnı keıbir qajet pánderge ǵana shaqyrtylǵan. Bul is-sharalar zııatkerlik mektepterdiń aldyna qoıylǵan maqsattarǵa tolyqqandy jetýge baǵyttalǵan, - dedi Oqý-aǵartý mınıstri.

Onyń aıtýynsha, atalǵan mektepterde qoldanylyp jatqan osy tájirıbesine oraı oqýshylar úlken halyqaralyq olımpıadalarda óte jaqsy nátıjeni kórsetip otyr.

- Sondyqtan osy mektepterde iske asyrylyp otyrǵan jumystar balalardyń biliminiń sapaly bolýyna oń áser etip otyrǵanyn jáne onyń durystyǵyn baıqatyp otyr, - dedi vedomstvo basshysy. 

Budan buryn habarlanǵandaı, qazir elimizde 267 myń orynǵa arnalǵan 232 mektep salynyp jatyr.