Mektepterge oqýlyqtardy jetkizý men taratý tolyq aıaqtaldy
ASTANA. KAZINFORM – Qazaqstan mektepterine jańa oqý jylyna qajetti barlyq oqýlyqtar men oqý-ádistemelik keshender tolyq jetkizildi. Bul týraly Oqý-aǵartý mınıstrliginiń Respýblıkalyq ǵylymı-praktıkalyq bilim mazmunyn saraptaý ortalyǵy habarlady.
Ortalyqtyń dereginshe, oqýlyqtardy bilim berý uıymdaryna jóneltý 100 paıyzǵa oryndaldy. Ótinimderdi qalyptastyrý jáne olardyń satyp alýyn qarjylandyrý dástúrli túrde jergilikti atqarýshy organdardyń esebinen júzege asyryldy.
- Jańa oqý jylyna oraı 7, 8, 10 jáne 11-synyptarǵa arnalǵan qaıta basylǵan oqýlyqtar, sondaı-aq bastaýysh býynǵa arnalǵan jańa basylymdar mektepterge jetkizildi. Ásirese 4-synypqa arnalǵan «Orys tili» (qazaq mektepteri úshin), aǵylshyn, nemis, frantsýz tilderi, «Eńbekke baýlý», «Beıneleý óneri», «Tsıfrlyq saýattylyq» jáne «Jaratylystaný» (qazaq jáne orys tilderinde) pánderinen jańa oqýlyqtar ázirlendi. Sonymen qatar 3-synyptarǵa uıǵyr jáne ózbek tilderindegi oqýlyqtar jaryq kórdi, - delingen aqparatta.
Erekshe bilim berý qajettilikteri bar balalardy oqýlyqtarmen qamtamasyz etý boıynsha da jumys atqaryldy. Kórý qabileti buzylǵan jáne nashar kóretin oqýshylarǵa arnalǵan arnaıy basylymdar daıyndaldy. Atap aıtqanda: «Qazaq tili» (1–3-synyptar), «Jaratylystaný» (1–4-synyptar), «Orys tili» (2–4-synyptar), «Dúnıetaný» (2–3-synyptar), sondaı-aq «Hımııa» jáne «Bıologııa» (7–10-synyptar, qazaq jáne orys tilderinde).
Orta jáne joǵary synyptarǵa da jańartylǵan oqýlyqtar shyǵaryldy. 7-synyp úshin – «Qazaq ádebıeti», «Qazaq tili men ádebıeti» (orys tilinde oqytatyn mektepterge), «Orys tili», «Orys ádebıeti», sondaı-aq «Orys tili men ádebıeti» (qazaq mektepteri úshin) oqýlyqtary qaıta basyldy. Budan bólek, algebra, geometrııa, aǵylshyn tili, fızıka, bıologııa, hımııa, Qazaqstan tarıhy jáne kórkem eńbek pánderi boıynsha da jańa basylymdar daıyndaldy.
Sonymen birge «Qazaqstan geografııasy» (7–8-synyptar), «Qazaqstan tarıhy» (8-synyp), «Alǵashqy áskerı jáne tehnologııalyq daıyndyq» (10–11-synyptar), «Quqyq negizderi» (11-synyp) oqýlyqtary jańartylyp, mektepterge jetkizildi.
Aıta keteıik, estý qabileti zaqymdalǵan balalarǵa arnalǵan 36 oqýlyq pen oqý-ádistemelik keshen ázirlenedi.