Mektepterge kezeń-kezeńmen akademııalyq avtonomııa beriledi - Ashat Aımaǵambetov

ASTANA. QazAqparat – Mektepterge arnalǵan jańa memlekettik standarttar men oqý baǵdarlamalary ázirlenip jatyr. Bul týraly Úkimet otyrysynda elimizdegi bilim berýdi damytýdyń 2026 jylǵa deıingi tujyrymdamasyn talqylaý kezinde Oqý-aǵartý mınıstri Ashat Aımaǵambetov aıtty, dep habarlaıdy QazAqparat tilshisi.

«Orta bilim berýdegi ózekti másele – ol bilim mazmuny men bilim sapasy. 2016 jyldan 2021 jylǵa deıin mektepter jańartylǵan baǵdarlamalarǵa kóshti. Krıterıaldy baǵalaý júıesi engizildi. Bul óz kezeginde óte mańyzdy ózgeris boldy. Degenmen, monıtorıngtik zertteýlerge sáıkes, jekelegen pánder boıynsha oqý baǵdarlamalary jetildirýdi qajet etedi. Osyǵan oraı mektep baǵdarlamalaryn jańǵyrtamyz. Qazir jumys toby quryldy, jańa memlekettik standarttar men oqý baǵdarlamalary ázirlenip jatyr», - dedi A. Aımaǵambetov.

Onyń aıtýynsha, mektepterge kezeń-kezeńmen akademııalyq avtonomııa beriledi.

«Bilim berý sapasyn syrttaı táýelsiz baǵalaý júıesi eńgiziledi, mektepterdiń attestattaý júıesi repressıvti mazmunnan, dıagnostıkalyq baǵytqa aýysady. Mekteptegi qorytyndy baǵalaýdyń nátıjesin halyqaralyq deńgeıde taný boıynsha jumystary júrgiziledi», - dedi mınıstr.

Budan buryn habarlanǵandaı, balabaqshalarda balalardy erte damytýdyń jańa modeli engizilip jatyr. Osy oraıda ondaǵy baǵdarlama da, oqytý ádisteri de túbegeıli ózgeredi.