Mektepterge akademııalyq derbestik berildi - BǴM
ASTANA. QazAqparat - Bıyldan bastap mektepterdiń pedagogıkalyq keńesteri biraz máselelerdi ózderi sheshe alady. Bir tıptik oqý jospary bolmaıdy. Árbir mektep ózine yńǵaıly jospardy qoldansa bolady, dep xabarlaıdy QazAqparat tilshisi.
QR Bilim jáne ǵylym mınıstri Erlan Saǵadıevtiń aıtýynsha, árbir mekteptiń derbes sheshim qabyldaý quzyreti - jańa oqý jylynyń taǵy bir mańyzdy jańalyǵy. Osyǵan baılanysty tıisti normatıvtik qujattarǵa ózgeris engizilip, pedagogıkalyq keńestiń sheshim qabyldaý quzireti keńeıtildi.
«Endigi jerde bes kúndik oqýdy jalǵastyrý, tıptik oqý josparyn tańdaý, pánderdi aǵylshyn tilinde júrgizýge kóshý, eksternatqa ruqsat berý, keıbir pánderdi bólip, ne bólmeı oqytý, bilim sapasyn baqylaý jáne taǵy da basqa suraqtardy pedagogıkalyq keńes ózi sheshedi», - dedi E.Saǵadıev Tamyz konferentsııasynyń plenarlyq májilisinde.
Mınıstrdiń sózine qaraǵanda, endi bir tıptik oqý jospary bolmaıdy. Búginde birneshe jospar ázirlendi.
«Mektep ózine keletin jospar boıynsha jumys jasaı alady. Osylaısha, barlyq mektepterge osy tıptik oqý josparlary arqyly akademııalyq derbestik berýdi durys dep esepteımiz. Jalpy, mektep josparlarymen qatar gımnazııa, lıtseıler, daryndy balalarǵa arnalǵan mektepter, keshki mektepter úshin oqý josparlary daıyndalǵanda muǵalimderdiń usynystary eskerildi», - dep atap kórsetti E.Saǵadıev.
Aıta keteıik, bıyl mınıstrlik muǵalimderdiń júktemesine qatysty buıryqty shyǵardy. Oǵan sáıkes, mektep muǵalimi tek 5 qujatty ǵana toltyrýǵa mindetti. Odan artyq salmaq salynsa, mektep basshylyǵynyń ústinen aryz túsirýge bolady.
