Mektepterge 5 kúndik oqytý standarttary engiziledi - Bilim mınıstri
ASTANA. QazAqparat - 2016 jyldan bastap, Qazaqstan mektepterinde 5 kúndik oqytý standarttary engiziledi. Bul týraly búgin Ortalyq kommýnıkatsııalar qyzmetinde ótken baspasóz máslıhatynda QR Bilim jáne ǵylym mınıstri Aslan Sárinjipov málim etti.
«Biz Qazaqstan Prezıdentiniń tapsyrmasymen orta bilim berý mazmunyn ózgertýdi bastap kettik. Jańa baǵdarlamalar engiziledi. Onda bilim berýden buryn, oqýshylarǵa qajetti mashyq pen daǵdylardy qalyptastyrýǵa úlken mán beriledi. Búginde biz 30 mektepti tańdap aldyq, qyrkúıekten bastap sol júıeni solarǵa tájirıbe retinde engizemiz. Kelesi jyly 1 synyptan bastap, barlyq mektepterge taratatyn bolamyz», - dep atap ótti mınıstr.
Onyń aıtýynsha, jańa standarttar balanyń oqýǵa tıisti baǵdarlamasyn aýyrlatpaıdy.
«Oqýshylardyń oqý kóleminiń tym artyp ketkendigine qatysty pikirge keletin bolsaq, aýyrtpalyq ózgermeıdi. Oqý baǵdarlamasy odan ári aýyrlamaıdy. Jańa standart boıynsha biz 5 kúndik oqý júıesin qarastyryp otyrmyz. Mektepterdiń basym bóliginde 5 kúndik oqý bolady. Oqýshylar tym kóp jáne úsh aýysymda oqytatyn mektepterde 6 kúndik oqytý áli saqtala bermek. Biraq olardyń sany biren-saran», - dedi A. Sárinjipov.
