Mektepterdiń jańa oqý jylyna daıyndyǵyna baqylaý kúsheıtiledi
ASTANA. KAZINFORM — Oqý-aǵartý mınıstri Juldyz Súleımenova barlyq óńirdiń bilim basqarmalarynyń basshylarymen jańa oqý jylyna daıyndyq máseleleri boıynsha keńes ótkizdi.
Vedomstvonyń baspasóz qyzmetiniń málimetinshe, basty nazar bilim berý nysandarynyń jańa oqý jylyna daıyndyǵyna aýdaryldy.
Jańa mektepter qurylysynyń barysy, jóndeý jumystary jáne qoldanystaǵy bilim berý uıymdarynyń oqýshylardy qabyldaýǵa daıyndyǵy qaraldy.
Bilim basqarmalarynyń basshylary óńirlerdegi qurylys pen jóndeý jumystarynyń barysy, nysandardyń daıyndyǵy jáne sheshýdi qajet etetin máseleler týraly baıandady.
— Keńes qorytyndysy boıynsha óńirlerge jumystardyń merzimi men sapasyn baqylaýdy kúsheıtip, bilim berý uıymdarynyń jańa oqý jylyna tolyq daıyndyǵyn qamtamasyz etý tapsyryldy, — delingen habarlamada.
Osyǵan deıin jańa oqý jylynda 380 myńnan astam bala birinshi synypqa baratynyn jazǵanbyz.
