Mektepterdiń sanıtarııalyq daıyndyǵy: Túrkistan oblysynda 1800-den astam nysanda kemshilik anyqtaldy
TÚRKІSTAN. KAZINFORM — Túrkistan oblysynda bilim berý uıymdarynyń jańa oqý jylyna sanıtarııalyq daıyndyǵy tekserildi.
Túrkistan oblysynyń sanıtarııalyq-epıdemıologııalyq baqylaý departamentiniń málimetinshe, óńirdegi 1811 nysan monıtorıngpen tolyq qamtyldy.
— Monıtorıng nátıjesinde 1807 nysanda kemshilik anyqtalyp, olardy joıý týraly nusqamalar berildi. Budan bólek sanıtarııalyq-epıdemıologııalyq qorytyndynyń bolmaýy jáne sýmen jabdyqtaý júıelerindegi aqaýlarǵa baılanysty 33 mektepke qatysty jedel sharalar qabyldandy, — dedi oblystyq sanıtarııalyq-epıdemıologııalyq baqylaý departamenti basshysynyń orynbasary Asqar Ysqaqov.
Onyń aıtýynsha, monıtorıng barysynda negizinen mektep aýmaqtarynyń abattandyrylýy, sýmen jáne ystyq sýmen qamtamasyz etilýi, sanıtarııalyq toraptardyń jaǵdaıy, jaryqtandyrý jáne jeldetý júıeleri, ǵımarattardyń sanıtarııalyq-tehnıkalyq jaı-kúıi, sondaı-aq sport zaldary men as bloktarynyń talaptarǵa sáıkestigi boıynsha kemshilikter anyqtaldy.
Qazir 1024 mektepke berilgen nusqamanyń 941-i boıynsha buzýshylyqtardyń joıylǵanyn rastaıtyn qujattar usynylǵan. Qalǵan 114 mektep boıynsha baqylaý jumystary jalǵasyp jatyr.
— Olardyń ishinde 45 mektepke qatysty jospardan tys tekserý júrgizý jumystary bastaldy. Alty mektep boıynsha jospardan tys tekserý aıaqtalyp, anyqtalǵan buzýshylyqtar rastaldy. Bul mektepterge qatysty Ákimshilik quqyq buzýshylyq týraly kodekstiń tıisti baptary boıynsha ákimshilik sharalar qabyldanyp, materıaldar sotqa joldandy, — dedi spıker.
Aıta keteıik, Túrkistan oblysynda 1089 jalpy bilim beretin mektep jumys isteıdi. Onyń 916-sy — memlekettik, 173-i — jekemenshik.
Buǵan deıin Túrkistan oblysynda 700-den astam qoǵamdyq tamaqtaný nysanynyń tıisti ruqsat qujaty bolmaǵanyn jazǵan edik.
