Mektepterdiń jartysyna jýyǵy salynǵanyna 40 jyldan asyp ketken - Ashat Aımaǵambetov
NUR-SULTAN. QazAqparat – Osy máselege baılanysty Bilim jáne ǵylym mınıstri Ashat Aımaǵambetov ákimdikterden qarjylandyrý amaldaryn qarastyrýdy surap otyr, dep habarlaıdy QazAqparat tilshisi.
«Bıyl 6 678 mektepte aǵymdaǵy jóndeý júrgizildi. Kúrdeli jóndeýge keletin bolsaq, jergilikti atqarýshy organdar jyl saıyn apattyq mektepterdiń ósýin týyndatatyn mektepterdi jóndeý jumysyn tolyǵymen qarjylandyrmaıdy. Mektepterdiń 44 paıyzy 1980 jylǵa deıin salynǵanyn eskere otyryp, ákimdikterden kúrdeli jóndeýge tıisti qarjylandyrý amaldaryn qarastyrýyn suraımyn», - dedi mınıstr Úkimet otyrysynda.
Onyń aıtýynsha, bıyl 323 mektepke kúrdeli jóndeý júrgiziledi. Bul qajettiliktiń 45 paıyzyn ǵana qurap otyr.
«10 tamyzdaǵy jaǵdaıǵa súıenetin bolsaq, jalpy kúrdeli jóndeý 129 mektepte aıaqtalyp, 194 mektepte jalǵasýda. Aqmola, Almaty, Atyraý oblystarynda jóndeý jumystarynyń aıaqtalmaı qalý qaýpi týyndaǵanymen, Úkimet basshysyń tikeleı tapsyrmasy boıynsha bul mektepterde qosymsha jumysshylar tartylyp, olar 2-3 aýysymda jumysty jalǵastyryp jatyr. Jalpy, meniń ózim de biraz mektepterdi aralap qaıttym. Baqylaý departamentteri de tekserdi. Jalpy, jumys qarqyny jaqsy. Osy mektepter 1 qyrkúıekke deıin jumystaryn aıaqtaıdy dep esepteımiz», - dedi Ashat Aımaǵambetov.
Eske sala ketsek, búgingi Úkimet otyrysynda Premer-mınıstr Asqar Mamın óńir ákimderine barlyq bilim berý uıymdary jumysty bastaýǵa 100 paıyz daıyn bolýy kerektigin tapsyrǵan bolatyn.
