Mektepterdiń teń jartysynda baqylaý kameralary standartqa saı emes - Turǵymbaev
«Tatarstandaǵy qaıǵyly oqıǵaǵa baılanysty Memleket basshysynyń tapsyrmasymen mektepter qaıta tekserildi. Nátıjesinde birqatar kemshilikter tabyldy: mektepter 100% beınebaqylaý kameralarymen qamtamasyz etilgen. Biraq onyń jartysy (45,5%) standartqa saı kelmeıdi. Jumys istemeıtin, toqqa qosylmaǵan jáne barlyq aýmaqty qamtymaǵan kameralar bar. Mundaı kemshilikter Qaraǵandy oblysynda kóp tirkelgen. 505 mekteptiń 84% tıisti beınekamera ornatylmaǵan. Túrkistan oblysyndaǵy 889 mekteptiń 70% beınekameralar tehnıkalyq parametrge saı emes», - dedi E. Turǵymbaev Úkimet otyrysynda.
Mınıstrdiń aıtýynsha, beınekameralar mektepke kiretin jáne shyǵatyn esikte, ár qabatta jáne aýlada turýy kerek. Odan bólek kameralardyń barlyǵy Jedel basqarý ortalyǵyna qosylmaǵan. Respýblıka boıynsha bul ortalyqqa tek 1085 mektep qosylǵan. Mundaı problemalar Shymkent qalasy, Almaty, Jambyl jáne Batys Qazaqstan oblystarynda bar.
«Mektepterdiń 30 paıyzynda ǵana dybystyq jáne sıgnaldyq habarlaý júıesi bar. Bul júıeler Almaty, Pavlodar jáne Batys Qazaqstan oblystarynda joq. Sonymen qatar dabyl knopkalaryn barlyq mektepterge engizý qajet. Bul balalardy qaýipsiz jerge kóshirip, dabyl berý úshin qajet. Biraq bundaı dabyl knopkalary mektepterdiń tek 9% bar. Jáne olar kúzet uıymdaryna qosylýy tıis. Al kirýdi baqylaý jáne basqarý pýlti mektepterdiń 5%, týrnıketter – 4% bar. Bul júıege qosylǵan mektepterde elektrondy kartalar arqyly balalardyń kirip-shyqqanyn baqylaýǵa bolady. Sonymen qatar, ata-analaryna SMS jiberiledi. Qazir Nur-Sultan jáne Almaty qalalarynda osyndaı mektepter bar», - dedi mınıstr.