Mektepterdiń kemshiligin kózge shuqyp, «bastan ura» bergennen eshteńe shyqpaıdy – Aımaǵambetov
«Bizde bilim alýshylardyń oqý jetistigin monıtorıngileý bar. Bul júıeni aryqaraı damytamyz. Óıtkeni, bilim alýshylardyń oqý jetistigin monıtorıngileý PISA sııaqty qural bolýy kerek. Ekinshiden, bilim alýshylardyń oqý jetistigin monıtorıngileýden eshkim qoryqpaýy qajet. Úshinshiden, bilim alýshylardyń oqý jetistigin monıtorıngileý jáne attestatsııalaý ótkizgennen keıin onyń eshqandaı jazalaýshy yqpaly bolmaý tıis. Attestatsııadan ótpedińiz be, onda birinshi ret ol kómek sııaqty bolýy qajet. Adam aýyryp qalǵanda oǵan eshkim «aýyryp qaldyń» dep uryspaıdy ǵoı. Eger mektepke baryp, tekseris jumysyn júrgizip, kemshilikterdi anyqtasaq, onda «mynadaı máseleler bar, oǵan osyndaı kómek kerek» dep aıtýymyz kerek. Sol kómekti kórsetý úshin Bilim akademııasynan, «Órleýden» bir top shyǵyp, jarty jyl, 1 jyl kómektesýi qajet. Sonda mektepter olardy túsinetin bolady», - dedi mınıstr.
Ashat Aımaǵambetov mınıstrlik tarapynan kemshiligi bar bilim berý uıymdaryna kómek kórsetilgenimen, nátıje shyqpasa, onda ol basqa másele ekendigin basa aıtty.
«Biraq, utqyr top jiberip, kómektesip, qajet bolsa pedagogterdi kýrstarda oqytyp, ádestemelik járdem bersek, naqty nátıje bolady. Al jaı ǵana «mynaý jaman, mynaý istelmedi» dep, «bastan ura» bergennen eshteńe shyqpaıdy. Bes jyldan soń kelsek, taǵy solaı turady», - dedi ol.
Aıta ketıik, búgin Nur-Sultan qalasynda Y. Altynsarın atyndaǵy Ulttyq bilim akademııasynda tamyz konferentsııasy aıasynda «Bilim sapasyn qamtamasyz etýdiń ulttyq júıesi» taqyrybynda paneldik sessııanyń jalpy otyrysy ótip jatyr.
