Mektepterdi jańǵyrtý úshin jeke memlekettik baǵdarlama qajet – Májilis depýtaty

ORAL. QazAqparat – Mektepterdi jańǵyrtý, qaıta qurý, jóndeý jáne salý úshin jeke memlekettik baǵdarlama qajet. Bul týraly Batys Qazaqstan oblysynda jumys saparymen júrgen Májilis depýtaty Snejanna Imasheva málim etti, dep habarlaıdy QazAqparat tilshisi.

Depýtat facebook-tegi óziniń paraqshasynda jazǵanyndaı, Báıterek aýdanynyń Novenkıı, Dostyq, Makarov aýyldaryn aralaǵan kezde keleńsiz kórinistiń kýási bolǵan.

«Saraıǵa kóbirek uqsaıtyn bilim ordalarynda boldym. Jartylaı apatty, qıraǵan eski ǵımarattardyń tóbesinen sý aqqan, qabyrǵalary jarylǵan, buryshtary kógergen, edenderi jalba-julba. Osyndaı mektepter kún saıyn balalardy qabyldaıdy. Balalar mundaı qarańǵy jerge kirgisi kelmeıtin shyǵar, biraq bilim úshin, amaly joq, barady. Bir mektepke myńǵa jýyq, ekinshisine alty júzdeı, úshinshisine elý oqýshy kelip júr. «Turmys sanany bıleıdi» dep jatady. Eger osy qaǵıdany ustansaq, balalardyń bilimi qıraǵan saraı sekildi tómen bolýy kerek edi. Alaıda soǵan qaramastan, bul mektepterde oqý ozattary kóp, túrli olımpıada júldegerleri, jobalar jeńimpazdary barshylyq. Muǵalimderge taǵzym!» dep jazdy Snejanna Imasheva.

Ol sondaı-aq QR Bilim jáne ǵylym mınıstri Ashat Aımaǵambetovke qarata: «Bizge mektepterdi jańǵyrtý, qaıta qurý, jóndeý jáne salý úshin jeke memlekettik baǵdarlama qajet. Mundaı mektepter elimizde az emes. Tek ákimderge úmit artýǵa, olar qashan qarjy tabady dep kútip otyrýǵa bolmaıdy», dedi ol.