Mektepterdi aýylda ǵana emes, qalalarda da salý kerek - depýtat
«Jyl saıyn Qazaqstanda mektep qurylysy úshin qomaqty qarjy bólinedi. Áıtse de, qazirgi ýaqytta Qazaqstanda 124 mektep úsh aýysymda oqıdy, 44 mektep apattyq jaǵdaıda jáne 127 myń oryn jetispeýshiligi bar. Elbasy óz Joldaýynda ýrbanızatsııa týraly aıtyp ketti jáne búgin Parlament Úkimetke mektep qurylysyn qaıta qaraýdy usynyp otyr. Sońǵy úsh jylda mektepter tek qana aýyldarda salynyp keledi. Qalada mektepter turǵyzymaıdy. Sondyqtan, oryn jetispeýshiligi respýblıkalyq mańyzy bar mega qalalarda ǵana emes, oblys qalalarynda da bar», - dedi N. Jumadildaeva.
Depýtattyń aıtýynsha, úsh jyldyq bıýdjette 39 jańa mektep turǵyzyp, 2017-2018 jyldary bastalǵan 50 mekteptiń qurylysyn aıaqtaý úshin 89 mlrd teńge qarastyrylyp otyr.
Memleket basshysy óz Joldaýynda oqýshylarǵa oryn jetispeıtini, mektepterdiń úsh aýysymda oqytý jáne apat jaǵdaıynda bolý problemalary meılinshe sezilip otyrǵan óńirler úshin Úkimetke 2019-2021 jyldarǵa arnalǵan bıýdjetten qosymsha 50 mıllıard teńge qarastyrýdy tapsyrdy.
Sonymen birge, depýtat balabaqsha tárbıeshileriniń eńbekaqysy qansha protsentke ósetinin eseptedi.
«Memlekettik jáne jeke sektordyń kúsh salýymen búginde balalardyń 93% mektepke deıingi bilimmen qamtyldy. Endi bul salada sapaly bilim berý máselesi paıda boldy. Ol úshin sapaly mamandar kerek. Pedagogtar jetispeýshiligi bar. Joldaýda alǵash ret mektepke deıingi bilim berý mamandaryna kóńil bólinip otyr. Olardyń qazirgi eńbekaqysy 29 myń teńge. Aldyn ala esep boıynsha, olardyń aılyǵy 35%-ke artýy múmkin. Jáne bul mektepke deıingi bilim berý salasynda jumys istep júrgen 98 myńǵa jýyq adamǵa kómek bolady», - dedi N. Jumadildaeva.
Eske sala ketsek, keshe Qazaqstan Prezıdenti Nursultan Nazarbaev «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Joldaýyn jarııalady.
