Mektepterdegi oryn tapshylyǵy 500 myńǵa jetýi múmkin - senator

NUR-SULTAN. QazAqparat - 2025 jylǵa qaraı mekteptegi oryn tapshylyǵy shamamen 500 myńdy quraýy múmkin. Bul týraly senator Murat Baqtııaruly elimizdiń Premer-Mınıstr Álıhan Smaılovtyń atyna joldaǵan depýtattyq saýalynda aıtty, dep habarlaıdy QazAqparat tilshisi.

Senatordyń aıtýynsha, qazir elimizde 7500 mektep bolsa, onyń 169-y úsh aýysymdy, 5068-i eki aýysymdy mektep. Máseleni sheshý úshin mektep qurylysyna tartylǵan ınvestorlarǵa jumys jaǵdaıyn jasaý mańyzdy.

«Birinshiden, áli de bolsa memleketten bala basyna shaqqandaǵy qarjylandyrýdyń kólemin kóbeıtý kerek. Ekinshiden, úlken syıymdylyqty mektep salatyn ınvestorlarǵa jerdi tegin berip, mektep salatyn jerlerge kommýnıkatsııa jetkizý máselesin sheshý qajet. Úshinshiden, mektep máselesi túbegeıli sheshilgenge deıin bankterden jeńildetilgen nesıe berýdiń tetigin qarastyrý qajet. Aıtylǵan osy usynystar ınvestorlardy aqyly túrde emes, tegin oqytatyn mektepter salýǵa múddeli etetini sózsiz», - dedi M. Baqtııaruly Senattyń jalpy otyrysynda.

Depýtattyń aıtýynsha, búginde elimizdegi 378 jekemenshik mektepte 7900 muǵalim jumys istep, 144 myń oqýshy bilim alyp jatyr. Alaıda, jan basyna shaqqandaǵy qarjylandyrý júıesine qaramastan, memlekettik jáne jekemenshik oqý oryndary arasynda keıbir quqyqtyq teńsizdikke jol berilgen.

«Mysaly, «Bilim týraly» Qazaqstan Respýblıkasynyń Zańynda Bilim alýshylardy «jalpy bilim berý» qory aıasynda oqýlyqtarmen, sondaı-aq tamaqpen, kıimmen jáne keńse taýarlarymen qamtamasyz etý tek memlekettik bilim berý uıymdary úshin ǵana kózdelgen, jeke mektepterge berilmeıdi. Sonymen qatar, bıýdjettik Biliktiliktiń 221 jáne 222 baǵdarlamalarynda kadrlardyń biliktiligin arttyrý men qaıta daıarlaýdy júrgizý tek memlekettik bilim berý uıymdary úshin kózdelgen. Osyǵan baılanysty atalǵan máselelerdi retteý úshin «Bilim týraly» QR Zańyna ózgerister engizý qajet», - dep túıindedi sózin senator.