Mektepterdegi qaýipsizdikke nazar aýdarmaǵandar jumystan shyǵady -Ashat Aımaǵambetov

ASTANA. QazAqparat – QR Oqý-aǵartý mınıstrliginiń apparat keńesinde mektepterde balalardyń qaýipsizdigin qamtamasyz etý máselesi qaraldy, dep habarlaıdy QazAqparat tilshisi.

«Bilim berý mekemelerindegi qaýipsizdikti qamtamasyz etýge qatysty nysandardy beıne baqylaý júıesimen, lıtsenzııalanǵan kúzetpen, dabyl júıesimen jáne týrnıkettermen jabdyqtaý eskerilgen. Іri qalalardaǵy orta bilim berý uıymdary boıynsha respýblıka aýmaǵynda 1351 nysan qamtylǵan. Mamandandyrylǵan kúzet qyzmetterimen 83 paıyzy shart jasasqan. Bul turǵyda eń tómen kórsetkish Qostanaı, Soltústik Qazaqstan jáne Túrkistan oblystarynda baıqalyp otyr. Sonymen qatar, týrnıketterdiń ornatylýy 63 paıyz deńgeıinde. Osy baǵytta eń tómen kórsetkish Almaty qalasy, Túrkistan, Batys Qazaqstan, Jambyl, Aqtóbe, Soltústik Qazaqstan, Shyǵys Qazaqstan oblystarynda tirkeldi», - dedi Oqý-aǵartý vıtse-mınıstri Ǵanı Beısembaev.

Onyń aıtýynsha, el aýmaǵyndaǵy orta bilim berý uıymdarynyń 97 paıyzynda dabyl túımeleri ornatylǵan.

«Jalpy, bilim berý mekemelerinde beıne baqylaý júıesi 100 paıyz ornatylǵan. Degenmen olardyń ishki ister organdarynyń jedel basqarý ortalyǵyna qosylýyn qamtamasyz etý deńgeıi elimiz aýmaǵynda 51 paıyzdy qurady. Bul baǵytta eń tómen kórsetkish Batys Qazaqstan, Aqtóbe, Jambyl, Aqmola, Almaty, Qaraǵandy oblystarynda baıqalyp otyr. Osy oraıda bilim berý uıymdaryndaǵy osy jaǵdaıǵa nazar aýdarý kerek», - dedi vıtse-mınıstr.

Onyń sózine qaraǵanda, jyl sońyna deıin atalǵan máseleni sheshý kerek. Bul jumystar kámeleketke tolmaǵandardyń quqyqtaryn qorǵaýǵa, qaýipsizdigin qamtamasyz etýge múmkindik beredi.

Óz kezeginde QR Oqý-aǵartý mınıstri Ashat Aımaǵambetov keıbir óńirlerdiń ákimdikteri, bilim basqarmalary bul máseleni tıisti deńgeıde baqylamaı otyrǵanyn aıtty.

«Sondyqtan bul jumysqa jaýapty adamdardy jaýapkershilikke tartý boıynsha usynys jasaımyz. Úkimettiń deńgeıinde osy máseleni kóteremiz. Jyldyń sońyna deıin atalǵan mindetter oryndalmasa, jaýapty qyzmetkerlerdi jumystan shyǵarýdy talap etemiz. Balalardyń qaýipsizdigine basa nazar aýdarý kerek», - dedi mınıstr.

Budan buryn habarlanǵandaı, Qazaqstannyń barlyq mektepteri beınebaqylaý kameralarmen qamtamasyz etilgen. https://kaz.inform.kz/news/beynebakylau-dabyl-tuymesi-zhane-kuzet-mektep-kauipsizdigi-ushin-kansha-karazhat-bolinedi_a3806349