Mektepterdegi qaǵazbastylyq pen tekserýlerge moratorıı jarııalaý kerek - M. Baqtııaruly
ASTANA. QazAqparat - Búgin Senat otyrysynda derbes bilim berý uıymdarynyń qyzmetin retteý máselelerine arnalǵan zań jobasyn talqylaý barysynda senator Murat Baqtııaruly mekteptegi qaǵazbastylyq máselsin synǵa aldy.
Depýtattyń aıtýynsha, búgingi kúni elimizde 7561 orta bilim beretin mektepterde 2,5 mln oqýshy oqıdy. Olarǵa 300 myńǵa jýyq muǵalim sabaq beredi.
«Bizdiń muǵalimderdiń ortasha jalaqysy 45-62 myń teńge shamasynda ǵana. Munyń ústine mektepterdegi qaǵazbastylyq máselesi syn kótermeıdi. Qazir muǵalimderdiń pándi tereń bilýi, oǵan qatysty izdenýi men sabaq mazmunyn tereń túsindirip berýi basty talapqa jatpaıtyn bolyp barady. Kerisinshe, sabaq josparynyń jasalýy, baǵa qoıý dápteri, jýrnaldary, Ulttyq biryńǵaı testke daıyndaý basty kórsetkishke aınalýda», - deıdi M. Baqtııaruly.
Budan bólek, depýtat mektepterdegi taýsylmaıtyn tekseris pen qaptaǵan komıssııanyń tolyp ketkenin alǵa tartady. Senatordyń paıymynsha, ultymyzdyń básekege qabilettiligi bilim berý sapasyna tikeleı baılanysty.
«Alaıda, qaptaǵan qaǵaz ben bitpeıtin komıssııa turǵanda bilim básekege qabiletti bola ala ma? Bizge osynshama taýsylmaıtyn qaǵaz toltyrýdan góri tereń bilimdi, saýatty urpaq daıyndaý mańyzdy bolsa kerek. Demek, mektepterdegi qaǵazbastylyq pen tekserýlerge moratorıı jarııalaý kerek», - dedi senator.
