Mektepterdegi er muǵalimderdiń az bolýynan urpaq tárbıesinde utylar tustarymyz da kóp - M. Baqtııaruly
ASTANA. 6 jeltoqsan. QazAqparat - Mektepterdegi er-azamat muǵalimderdiń az bolýynan urpaq tárbıesinde utylar tustarymyz da kóp. Búgin Senattyń jalpy otyrysynda Úkimet basshysynyń atyna saýal joldaǵan depýtat Murat Baqtııaruly osylaı málim etti.
Depýtattyń málimetine qaraǵanda, qazir elimizdegi jalpy orta bilim beretin 7698 mektepterinde 292 000 muǵalim qyzmet jasaıdy. Onyń 234 445-i, ıaǵnı 80,5 paıyzy qyz-kelinshekter eken. Al mamandardyń pikiri boıynsha, mektepterdegi muǵalim bolyp júrgen er-azamattardyń azdyǵy keı jaǵdaıda urpaq tárbıesine de keri áserin tıgizýde.
«Kóbinese qyz-kelinshekterden bilim men tárbıe alyp júrgen er balalardyń minez-qulyqtary ózgeredi, bos belbeý, boıkúıezdikke urynatyndyqtary aıtylyp júr. Bul jaǵdaı mektep oqýshylary arasyndaǵy qylmystyń kóbeıýine de áser etýde. Jalpy, mektepterdegi er-azamat muǵalimderdiń az bolýynan urpaq tárbıesinde utylar tustarymyz da kóp. Jasóspirim qyzdarymyz ıbaly, uldarymyz er minezdi, namysshyl bolyp ósýleri úshin mektepterimizdegi pedagog er-azamattar kóp bolýy kerek. Bul úshin er-azamattardy muǵalimdik mamandyqtarǵa barýǵa qyzyqtyratyn arnaıy tetikter jasalýy kerek, ıaǵnı pedagogıkalyq mamandyqtar boıynsha kadrlar daıyndaýdyń arnaıy tujyrymdary men talaptary túbirinen qaıta qaralýy qajet», - deıdi senator.
Onyń sózine qaraǵanda, keıbir memleketter mektepterdegi er muǵalimniń qataryn kóbeıtip, olardyń jetispeýshiligin boldyrmaý maqsatynda bul máseleni arnaıy ústemaqy tóleý arqyly sheship otyr. «Zııatker ult qalyptastyrý men ult pen urpaq bolashaǵyn oılasaq, endigi arada bilim uıasy mektepterimizdegi muǵalimder kadrlaryn daıyndaýdyń jańa júıesin qalyptastyrýǵa aıryqsha kóńil bólý qajet dep sanaımyz», - dedi ol.
