Mektepterdegi ashanalar men dárethanalardyń jaı-kúıi qoǵam nazarynda bolady - QR BǴM
Aktsııa «Mekteptiń jaqsarýyna kómektes!» uranymen ótip jatyr.
QR Bilim jáne ǵylym mınıstrligi baspasóz qyzmetiniń habarlaýynsha, aktsııaǵa kez kelgen nıet bildirýshi qatysa alady: mektep oqýshylary, eriktiler, balalar ókildigi, muǵalimder, ata-analar, úkimettik emes uıymdardyń ókilderi jáne t.b.
Osyndaı kraýdsorsıng jáne kóptegen múddeli tulǵany tartý arqyly jyly dárethanalary joq jáne balalarǵa sanıtarlyq-gıgıenalyq jaǵdaı jasalmaǵan bilim berý uıymdary anyqtalady.
«Mektepterdi qarjylandyrýdyń zańnamalyq fýnktsııalary, olardyń qurylysy men qajetti jaǵdaılardy, onyń ishinde sanıtarlyq jaǵdaıdy jasaý máseleleri ákimdikterdiń quzyrynda ekenin atap ótken jón. Buǵan deıin mınıstrlik mektep dárethanalary men mektep mázirin jaqsartý boıynsha sharalar qabyldaý úshin birqatar óńirdiń ákimdikterine hat joldaǵan bolatyn. Biz bul máseleni baqylaýda ustaımyz. Aktsııany ótkizý balalardyń mektepte jaıly bolýy úshin jaǵdaı durys jasalmaǵan bilim berý uıymdaryn anyqtaýǵa kómektesedi. Monıtorıng jazalaý úshin emes, mektepterdi birlesip balalarǵa qajetti jaǵdaı jasaýǵa tartý úshin júrgiziledi. Mektep ákimshilikterine buzýshylyqtardy joıýǵa ýaqyt beriledi. Sonymen qatar mektep ashanalarynda problemaly jýynatyn bólmeler men zań buzýshylyqtar týraly habarlaǵandardyń aty-jóni jáne olar týraly aqparat jarııa etilmeıtinine kepildik beriledi. Mektep oqýshylary, muǵalimder, ata-analar da mektep ashanalaryndaǵy baǵanyń kóterilgenin, olardyń mektep mázirine qanshalyqty qanaǵattanatynyn habarlaı alady. Odan bólek, qandaı ashanalarda zııandy taǵamdar, ıaǵnı fastfýd, gazdalǵan sýsyndar satylatyny týraly da málimet bere alady», - dedi QR BǴM Balalardyń quqyqtaryn qorǵaý komıteti tóraǵasynyń orynbasary Elına Paýlı.
Naýqan sharttaryna keletin bolsaq, birinshi kezeń «Check your school» dep atalady. Aktsııaǵa qatysýǵa nıet bildirgender 87006990446 nómiri boıynsha WhatsApp pen Telegram-ǵa foto jáne vıdeo jibere alady. Sonymen qatar Instagram jáne Tiktok áleýmettik jelileri arqyly #BalaǵaLaıyq #balagalaiyq heshtegi arqyly jýynatyn bólme men ashananyń fotolary men vıdeolaryn jibere alady.
Vıdeonyń uzaqtyǵy 2 mınýttan, fotosýret 10 kadrdan aspaýy kerek. Bul rette bilim berý uıymynyń ataýyn jáne onyń mekenjaıyn kórsetý qajet. Osyndaı málimetter kórsetilmegen materıaldardy jumys toby qarastyrmaıdy. Sondaı-aq materıaldardy mektep ashanalarynda (as bloktarynda), bilim berý uıymdarynyń jýynatyn bólmelerinde talaptardy saqtaý máseleleri týraly jýrnalıstik sıýjetter túrinde de usynýǵa bolady.
Arnaıy qurylǵan jumys toby kelip túsken materıaldardyń jýynatyn bólmeler men ashanalarǵa qoıylatyn talaptarǵa sáıkestigin baǵalaıdy. Odan keıin fotolar men vıdeolardy buzýshylyqtardy joıý talaptarymen óńirlerdiń Bilim basqarmalaryna joldaıdy.
«Qateler boıynsha jumys» júrgizilgennen keıin Instagram-daǵy @balaga.laiyq paraqshasynda mektep dárethanalary men ashanalarynyń «deıingi jáne keıingi» fotolary men vıdeolary jarııalanady.
«Mektep oqýshylary, muǵalimder, ata-analar jáne basqa da múddeli tulǵalar, mysaly, sanıtarlyq jaǵdaıdyń joqtyǵy, krandardyń jumys istemeıtini, mektep ashanalaryndaǵy sapasyz taǵam jáne t.b. habarlaı alady. Barshańyzdy naýqanǵa belsene qatysyp, bilim berý uıymdaryn jaıly ári qaýipsiz etýge shaqyramyz. Aıta keteıik, aktsııaǵa qatysýshylar mektep dárethanalary men ashanalarynyń normalaryna sáıkes kelmeıtinimen qosa, úlgili, ıaǵnı talapqa saı keletinderiniń de foto jáne vıdeolaryn jibere alady. Aktsııa qorytyndysy boıynsha balalardyń oqýy men mektepte bolýyna qolaıly jaǵdaı jasalǵan úzdik mektepter marapattalady», - dep túsindirdi QR BǴM Balalardyń quqyqtaryn qorǵaý komıteti tóraǵasynyń orynbasary Elına Paýlı.
