Mektepterdegi kanıkýl men emtıhan kestesi bekitildi
ASTANA. KAZINFORM — Elimizde 2026–2027 oqý jylynyń bastalý jáne aıaqtalý merzimi, kanıkýldardyń uzaqtyǵy, sondaı-aq 9 jáne 11-synyp túlekteriniń qorytyndy attestattaý kestesi bekitildi. Tıisti buıryqqa Oqý-aǵartý mınıstriniń mindetin atqarýshy qol qoıdy.
Qujatqa sáıkes, barlyq orta bilim berý uıymynda jańa oqý jyly 2026 jylǵy 1 qyrkúıekte bastalyp, 2027 jylǵy 25 mamyrda aıaqtalady.
Birinshi, ekinshi jáne tórtinshi toqsandar 8 oqý aptasy bolyp bekitilse, úshinshi toqsan 10 aptaǵa sozylady.
Kúzgi kanıkýl 2026 jylǵy 26 qazan men 1 qarasha aralyǵynda, qysqy demalys 2026 jylǵy 28 jeltoqsannan 2027 jylǵy 10 qańtarǵa deıin, kóktemgi kanıkýl 2027 jylǵy 22–28 naýryz aralyǵynda ótedi. Al birinshi synyp oqýshylary úshin 2027 jylǵy 8–14 aqpan aralyǵynda qosymsha bir aptalyq demalys qarastyrylǵan.
Budan bólek, buıryqpen mektep bitirýshilerdiń qorytyndy attestattaý merzimderi de aıqyndaldy. 9 (10)-synyp oqýshylarynyń bitirý emtıhandary 2027 jylǵy 31 mamyr men 11 maýsym aralyǵynda, al 11 (12)-synyp túlekteriniń memlekettik bitirý emtıhandary 1–17 maýsym aralyǵynda ótedi.
9-synyp oqýshylary qorytyndy attestattaýdy 31 mamyrda matematıka páninen jazbasha emtıhan tapsyrýdan bastaıdy. 3 maýsymda tańdaý páninen, 7 maýsymda oqytý tili boıynsha, al 11 maýsymda qazaq nemese orys tili men ádebıetinen sońǵy emtıhan tapsyrady.
11-synyp túlekteri 1 maýsymda Qazaqstan tarıhynan aýyzsha emtıhan tapsyrady. Budan keıin 4 maýsymda «Algebra jáne analız bastamalary» páninen jazbasha emtıhan, 9 maýsymda oqytý tili boıynsha, 14 maýsymda tańdaý páninen, al 17 maýsymda qazaq nemese orys tili men ádebıetinen qorytyndy emtıhan ótedi.
Buıryq 2026 jylǵy 15 tamyzdan bastap kúshine enedi.
Aıta keteıik, jańa oqý jylynan bastap mektepterde úsh jańa mindetti kýrs engiziletin bolady.
