Mektepterdegi eski ádet joıylady: muǵalimder eseptilikti bir nusqada ǵana tapsyrady
ASTANA. KAZINFORM — Pedagogterdiń eseptilikti bir mezgilde qaǵaz jáne elektrondyq formatta júrgizýine jol bermeý. Bul týraly Májilistiń jalpy otyrysynda bilim berý máseleleri boıynsha ózgeris engizýdi talqylaý kezinde depýtat Ashat Aımaǵambetov málim etti.
— Zań jobasynda eseptiliktiń qaıtalanýy máselesine nazar aýdarylǵan. Depýtattarǵa muǵalimder osy másele boıynsha jıi júginedi. Ustazdar kóbine bir eseptilikti eki ret tapsyrýǵa májbúr. Elektrondy túrde aqparattyq júıege júkteıdi jáne qaǵazǵa shyǵaryp, jeke tapsyrady. Esep júıede bar bola tura, onyń ekinshi nusqasyn talap etýdiń qandaı qajettiligi bar? Bul suraqqa eshkim mardymdy jaýap bere almady, ıaǵnı jaı ǵana qalyptasyp qalǵan ádet. Osynyń saldarynan muǵalimniń ýaqytyn alady, — dedi Ashat Aımaǵambetov.
Osy oraıda ol bul másele boıynsha zańnamalyq norma engiziletinin, eseptilikti bir mezgilde eki formatta qaıtalaýǵa jol berilmeıtinin atap ótti.
— Eger elektrondy format bolsa, qaǵaz nusqasy mindetti bolmaıdy, — dedi depýtat.
Buǵan deıin pedagogterdi áleýmettik jaǵynan qoldaýdyń kandaı tetikteri bar ekenin jazǵan edik.
