Mektepterdegi beınebaqylaý júıesine jasandy ıntellektini engizý bastaldy
ASTANA. KAZINFORM — Búgin Quryltaıdaǵy Úkimet saǵatynda Oqý-aǵartý mınıstri Juldyz Súleımenova orta bilim berý júıesine jasandy ıntellektini engizý jumystaryna túsinik berdi.
- Respýblıka boıynsha 8 myńnan astam mektepte 4 mln oqýshy bilim alyp jatyr, 420 myń pedagog jumys istep keledi. 2026-2027 oqý jylynda 382 myń bala 1-synypqa qabyldandy. 11-synypta 214 myń oqýshy bilim alyp jatyr. Memlekettik jalpyǵa mindetti bilim berý standarty Jańa Konstıtýtsııada bekitilgen normalarǵa sáıkestendirildi, - dedi J.Súleımenova.
Sonymen qatar balalar halyqaralyq bilim dodalarynda joǵary nátıje kórsetip kele jatqanyn aıtty. 5 myńnan astam oqýshy 44 halyqaralyq olımpıada men ǵylymı baıqaýǵa qatysyp, 57 arnaıy marapatqa jáne 1 067 medalǵa ıe boldy. Onyń 204-i altyn, 356-sy kúmis jáne 507-i qola.
- Aýyl oqýshylarynyń respýblıkalyq olımpıadalarǵa qatysýy 125 myńǵa jetip, júldegerler sany on ese artty. Memleket basshysynyń qoldaýymen halyqaralyq olımpıada jeńimpazdary men olardy daıyndaǵan pedagogterge aqshalaı syıaqy tólenip jatyr, - dedi mınıstr.
Onyń sózine qaraǵanda, Memleket basshysynyń 2026 jylǵy 12 mamyrdaǵy Jarlyǵyna sáıkes, orta bilim berý júıesine jasandy ıntellekt kezeń-kezeńimen engizilip jatyr.
Jobanyń maqsaty – qala men aýyl arasyndaǵy bilim sapasy alshaqtyǵyn qysqartyp, ár balaǵa jekelendirilgen oqytý múmkindigin usyný. Alǵashqy kezeńde 500 pılottyq mektep qamtylyp, 240 myń pedagog oqytyldy. 2028 jyly 2 600 shaǵyn jınaqty mektepti tolyq qamtý kózdelgen.
- Bilim berý uıymdarynyń beınebaqylaý júıelerine jasandy ıntellekt elementterin engizý bastaldy. Búginde Soltústik Qazaqstan (44 mektep) jáne Aqmola (35), Qaraǵandy (10) oblystarynyń mektepterinde engizilip jatyr, - dedi vedomstvo basshysy.
Buǵan deıin Almatyda jasandy ıntellekt olımpıadasynyń jeńimpazdary anyqtalǵanyn jazǵan edik.