Mektepterdegi «111» QR-kodyna kún saıyn 600 shaǵym túsedi

ASTANA. KAZINFORM – Mektepterge ornatylǵan «111» QR-kodyna kún saıyn 600 shaǵym túsedi. Bul týraly Bala quqyqtary jónindegi ýákil Dınara Zákıeva Májilistiń jalpy otyrysynan keıin BAQ ókilderiniń suraǵyna bergen jaýabynda aıtty.

-«111» memlekettik baılanys ortalyǵy bar. Ol Prezıdenti tapsyrmasy boıynsha byltyr qazan aıynda ashylǵanyn bilesizder. Onyń fýnktsııasy zańmen bekitilgen. Jeltoqsan aıynan bastap búkil mektepterge «111» QR-kody ornatyldy. Qazir kún saıyn balalar ózderin alańdatatyn másele týraly, zorlyq-zombylyqqa tap kelgenderin, psıhıkalyq-emotsıonaldyq jaı kúıi týraly 600-ge deıin SMS-hat joldaıdy. Osy habarlar negizinde «111» ortalyǵy polıtsııa departamentterimen baılanysady. Osy habarlar arqyly qylmystar anyqtalyp jatyr, - dedi Dınara Zákıeva. 

Bul QR-qural arqyly qońyraý shalý mindetti emes, habarlama jazsa da jetip jatyr. 

- Qazir balalar bul quraldy óte belsendi paıdalanyp júr. Olar úshin óz qıyndyǵyn qońyraý shalyp aıtqannan habarlama arqyly jetkizý ońaı bolyp shyqty. Buryn jyl saıyn 1000-ǵa jýyq qońyraý tússe, qazir kún saıyn 600 SMS keledi. Basynda tipti kúnine 1000 habarlama keletin. Ótken aıda 11 myńǵa jýyq SMS-habarlama kelse, býllıng, zorlyq-zombylyq, sýıtsıdtik, pıshıkalyq-emotsıonaldyq jaǵdaı sanaty boıynsha ǵana 400 jaǵdaıda kómek kórsetý kerektigi rastaldy. Habarlamalar arqyly keletin shaǵymdardyń sanaty óte kóp. Densaýlyq saqtaý máselesi boıynsha da, sabaqqa kómek surap ta habarlasyp jatady. Munyń bári ortalyqqa degen senim deńgeıin kórsetedi, - dedi D.Zákıeva. 

Buǵan deıin ol oqýshylar arasyndaǵy qatygezdik oqıǵalaryna qatysty pikir bildirgen edi.