Mektepterde jasandy ıntellektini jaýapkershilikpen qoldaný boıynsha oqytý bastaldy

ASTANA. KAZINFORM –  Y. Altynsarın atyndaǵy Ulttyq bilim akademııasy elimizdegi barlyq mektep pedagogterine arnalǵan oqytý kýrstaryn bastady. Bul týraly Oqý-aǵartý mınıstrliginiń baspasóz qyzmeti habarlady. 

Baǵdarlamanyń negizgi maqsaty — qatysýshylardyń bilim berý úderisinde jasandy ıntellektini jaýapkershilikpen paıdalanýdyń qaǵıdattary týraly túsinigin qalyptastyrý.

Oqytý barysynda etıka men qaýipsizdik máselelerine erekshe mán beriledi: balanyń ıgiligine basymdyq berý, akademııalyq adaldyqty saqtaý jáne derekkózderdi belgileý, qoldanýdyń zańdylyǵy men derbes derekterdi qorǵaý, jas ereksheligin eskerý men pedagogıkalyq baqylaýdy qamtamasyz etý. Sondaı-aq jasandy ıntellektiniń shekteýleri men algorıtmdik beıtarap emestiginiń yqtımaldyǵyn da túsiný qajet.

Qatysýshylarǵa negizgi JI-quzyretter usynylady.

Pedagog úshin — sabaq maqsatyna sáıkes quraldardy negizdi tańdaý, alynǵan jaýaptardy synı turǵydan baǵalaý, etıkalyq jáne qaýipsizdik normalaryn saqtaý, ádistemelerdi únemi jetildirip otyrý.

Oqýshy úshin — jasandy ıntellektiniń tabıǵaty men shekteýlerin túsiný, usynylǵan jaýapty qabyldaý, túzetý nemese qabyldamaý qabileti, yqtımal beıtarap emestikti anyqtaý, akademııalyq adaldyq qaǵıdattaryn ustaný jáne pánaralyq jobalarǵa qatysý.

Oqytý materıaldary resmı qujattar negizinde ázirlendi:

«Orta bilim berý júıesinde jasandy ıntellektini qoldanýdyń etıkalyq standarttary»;
«Oqý úderisinde jasandy ıntellektini etıkalyq qoldaný jónindegi nusqaýlyq».

Y.Altynsarın atyndaǵy Ulttyq bilim akademııasy orta bilim berý júıesine ınnovatsııalyq tásilderdi engizýdi jalǵastyrýda. Akademııa muǵalimderge ádistemelik qoldaý kórsetip qana qoımaı, oqýshylardyń zamanaýı tehnologııalardy jaýapty ári sanaly qoldaný mádenıetin qalyptastyrýǵa yqpal etip keledi.

Aıta ketelik Májilis jasandy ıntellekti paıdalaný erejelerin bekitetin zań jobasyn talqylaıdy.