Mektepterde jańa oqýlyqtardyń aprobatsııasy bastalady

ASTANA. KAZINFORM — 29 qyrkúıekten bastap elimizdiń 34 pılottyq mektebinde 2026–2027 oqý jylyna arnalǵan jańa oqýlyqtardyń aprobatsııasy bastalady. Bul týraly Oqý-aǵartý mınıstrliginiń baspasóz qyzmeti habarlady. 

Aprobatsııany Oqý-aǵartý mınıstrliginiń Bilim mazmunyn saraptaý respýblıkalyq ǵylymı-praktıkalyq ortalyǵy uıymdastyrady.

Aprobatsııa 4-synypqa arnalǵan — «Qazaq tili», «Orys tili» (qazaq tilinde oqytatyn mektepter úshin), «Matematıka» (qazaq jáne orys tilderinde oqytatyn mektepter úshin), «Dúnıetaný», «Ádebıettik oqý» jáne 7–10 synyptarǵa arnalǵan «Dúnıejúzi tarıhy», «Algebra», «Qazaq tili», «Hımııa», «Bıologııa», «Fızıka», «Geografııa», «Quqyq negizderi», «Shetel tilderi» (aǵylshyn, nemis, frantsýz tilderi) oqýlyqtaryn qamtıdy.

— Aprobatsııa jańa oqý baǵdarlamasy negizinde ázirlengen jekelegen pánder boıynsha oqýlyqtardyń kúshti jáne álsiz tustaryn aıqyndaýǵa, sondaı-aq mektepter úshin ońtaıly oqý materıalyn irikteýge baǵyttalǵan. Ol oqýlyqtardy keń kólemde engizbeı turyp, oqýshylarǵa arnalǵan eń sapaly jáne tıimdi oqýlyqtardy aıqyndaýǵa múmkindik beredi, — dep atap ótti Bilim mazmunyn saraptaý respýblıkalyq ǵylymı-praktıkalyq ortalyǵynyń dırektory Nazıra Abdrahmanova.

Mańyzdysy, aprobatsııaǵa tek pedagogter ǵana emes, oqýshylar da qatysady. Bul oqýlyqtardyń fýnktsıonaldyǵy men tıimdiligi jan-jaqty túsinik qalyptastyrýǵa múmkindik beredi.

Esterińizge sala keteıik, ortalyq bes satyly saraptama jumysyn júrgizedi: ǵylymı-pedagogıkalyq saraptama, pysyqtaý kezeńi, pılottyq mektepterde aprobatsııa, qoǵamdyq talqylaý jáne pándik saraptamalyq komıssııanyń qorytyndysy.

Sondaı-aq sarapshy bolýǵa ótinim bergisi keletin pedagogter bmso.kz resmı saıtynda saýalnamadan óte alady. 

Aıta ketelik QR-kod, birdeı kólem, salmaǵyn jeńildetý — mektep oqýlyqtary qalaı ózgergeni týraly jazǵan edik.