Mektepterde tarıhı-arheologııalyq qozǵalystar qurylmaq
«Elbasynyń «Uly dalanyń jeti qyry» atty maqalasy qoǵamnyń, jalpy ǵalymdardyń, bilim salasynyń, tarıhshylardyń kókeıindegi tolǵamdy oılardyń ózegin ashyp, atqarylar zor mindetterdiń baǵytyn aıqyndaıtyny sózsiz. Sonymen qatar bul maqala bilim salasymen tyǵyz baılanysty ári mańyzdy. Bilim berý - ol tárbıe, qundylyqtardy qalyptastyrý. Sondyqtan tarıhty bilý, rýhanı qazyna men tarıhı tulǵalardy bilý, otansúıgishtikti nasıhattaý úshin, tárbıe jumysyn ilgeriletý úshin berilgen tapsyrmalar óte mańyzdy», - dep toqtaldy vıtse-mınıstr Nur Otan» partııasy janyndaǵy «Mıras» respýblıkalyq qoǵamdyq keńestik otyrysynda.
A. Aımaǵambetov atalǵan sharalar mektep qabyrǵasynan bastalatynyn aıta kele, maqalada kóterilgen máselelerge bilim salasynyń barlyq sýbektileri qatysatynyn jetkizdi.
«Mektepterde ólketaný pánin engizemiz dep aıtqan bolatynbyz. Elbasynyń tikeleı tapsyrmasy bar. Ólketaný páni boıynsha barlyq óńirlerde jumys toptary quryldy. Búginde osy oqýlyqtar daıyn tur. Bul jumystyń aıasynda tıisti sharalar atqarylady. Týǵan ólkeniń tek tarıhyn ǵana emes, sonymen qatar ádebıetin, tulǵalaryn jan-jaqty taný boıynsha qajetti qadamdardy jasaımyz», - dedi A. Aımaǵambetov.
Budan bólek ol murajaılarda sabaq júrgizý turǵysynda mınıstrlik tıisti normatıvtik-quqyqtyq qujattarǵa ózgeris engizgenin atap ótti. Sondyqtan elimizdegi mektepterge murajaılarǵa baryp, sabaq ótkizý múmkindigi ashyldy.
«Elbasynyń tapsyrmasyna sáıkes, mektepterde tarıhı-arheologııalyq qozǵalystar qurylatyn bolady. Bul baǵyttaǵy jumystardy bastap kettik, tujyrymdamasy daıyn. «Arhıv - 2025» baǵyty boıynsha jumystarymyzdy jalǵastyramyz. Óıtkeni áli de shet memleketterde tarıhymyzǵa qatysty jádigerler barshylyq. Onyń barlyǵy zertteýdi qajet etip tur. Sáıkesinshe, tıisti jumysty Bilim jáne ǵylym mınıstrligi júrgizedi», - dedi ol.
Aıta keteıik, Elbasy Nursultan Nazarbaevtyń «Uly dalanyń jeti qyry» atty maqalasy jarııalandy.
