Mektepterde oqýshylarǵa kásiptik baǵdar beretin muǵalim bolady – Eraly Toǵjanov

NUR-SULTAN. QazAqparat – Bıyldan bastap mektep oqýshylaryna kásiptik baǵdar beretin muǵalim jumys isteıdi. Bul týraly Almatyda «AMANAT» partııasy «Jastar Rýhynyń» kezekten tys VI Sezi aıasynda «Jas Talks» ashyq dıalog alańynyń jumysyna qatysqan Premer-Mınıstrdiń orynbasary Eraly Toǵjanov aıtty, dep habarlaıdy QazAqparat.

«Adam úshin eń bastysy – bilim. Sebebi, bilimdi azamat ózin erkin sezinedi, bolashaqqa senimmen qaraıdy jáne qaı baǵytta qozǵalý kerektigin biledi. Árbir jas qazaqstandyq osyǵan umtylýy tıis. Árıne, mamandyq tańdaý – bul kúrdeli másele. Sondyqtan, bıyl mektepterde 7-synyptan bastap oqýshylarǵa kásiptik baǵdar beretin muǵalim jumys isteıdi. Ol oqýshylarǵa durys baǵyt tańdaýǵa kómektesedi», - dedi Eraly Toǵjanov.

Vıtse-premerdiń aıtýynsha, elimizde jastar arasyndaǵy jumyssyzdyq deńgeıi – 3,4%, al esh jerde jumys istemeıtin jáne oqymaıtyn jastar – 7,2%.

Qyzý pikirtalas barysynda vıtse-premer qatysýshylardyń suraqtaryna jaýap berdi. Úkimettiń jas býyn arasyndaǵy jumyssyzdyq deńgeıin tómendetý, NEET sanatyndaǵy jastardy áleýmettendirý jáne basqa da ózekti máselelerdi sheshý boıynsha júrgizilip jatqan jumystar týraly aıtty.

Eske salsaq, «AMANAT» partııasynyń Jastar qanaty «Jastar rýhy» dep atalatyn boldy.