Mektepterde bilim sapasyn baǵalaý úshin halyqaralyq zertteý júrgiziledi

ASTANA. KAZINFORM – 1 sáýir - 15 mamyr aralyǵynda elimizdiń bilim berý uıymdarynda bilim sapasyn baǵalaýǵa arnalǵan PIRLS-2026 jáne TIMSS-2027 halyqaralyq zertteýi ótkiziledi.

Oqý-aǵartý mınıstrligi málimetinshe, PIRLS-2026 zertteýiniń altynshy tsıkline 50-den astam el qatysyp jatyr.

PIRLS – 4-synyp oqýshylarynyń oqý saýattylyǵyn baǵalaýǵa baǵyttalǵan halyqaralyq zertteý. Qazaqstan atynan zertteýge 219 mektepten 8800-den astam oqýshy qatysady.

Sonymen qatar zertteý saýalnamasyna 8800 - ge jýyq ata-ana, 400-ge jýyq muǵalim jáne 219 bilim berý uıymynyń basshysy qatysady.

Aıta keteıik, Oqý-aǵartý mınıstrligi ótken jyldardaǵy tájirıbeni zerdeleı kele, oqýshylardy 1 - synypqa qabyldaý naýqanynyń bastalý merzimin 1 sáýirden 27 mamyrǵa aýystyrý týraly sheshim qabyldady. Bul týraly Oqý-aǵartý mınıstri Juldyz Súleımenova áleýmettik jelidegi paraqshasynda málimdedi.