Mektepterde metall izdeıtin qurylǵy ornatylýy múmkin

ASTANA. QazAqparat – Mektepterdi metall izdeý qurylǵysymen jabdyqtaý máselesi talqylanyp jatyr. Bul týraly Oqý-aǵartý birinshi vıtse-mınıstri Sholpan Karınova ortalyq kommýnıkatsııalar qyzmetinde aıtty, dep habarlaıdy QazAqparat tilshisi.

«Bilim uıymdary 100 paıyz beınebaqylaýmen jabdyqtalyp, 80 paıyzdan astamy jedel basqarý ortalyǵyna qosylǵan. Bilim uıymdarynyń 74 paıyzy mamandanǵan kúzet ustaıdy. Bilim oshaqtarynyń shamamen 94 paıyzynda «dabyl» túımesi bar. 2023 jyldyń 1 qyrkúıeginde osy parametrlerdiń bári 100 paıyz kórsetkishpen qamtamasyz etilýi kerek. Metall izdeý qurylǵysyna kelsek, mundaı usynys engizildi, qaralyp jatyr. Pedagogter men bilim uıymdary talqylap jatyr. Sheshim qabyldanǵan kezde resmı málimet beremiz», - dedi Sholpan Karınova.

Atalmysh sharada vıtse-mınıstr bıyl «Jazǵy mektep» jobasy jalǵaspaıtynyn aıtty.

«Jazǵy mektepterdi júrgizý koronavırýs ınfektsııasyna baılanysty qolǵa alynǵanyn bilesizder. Bıyl 1 maýsymnan bastap jazǵy demalys bastalady. Mektepter mektep janynan alańdar ashady. Bular negizinen bastaýysh jáne orta býyn synyptaryna arnalady. Odan úlken balalar da jazǵy demalysty lagerde nemese mektep janyndaǵy alańdarda ótkize alady», - dedi ol.