Mektepterde mamandandyrylǵan sport synyptary men toptary qurylatyn bolady
ASTANA. QazAqparat -Jańa redaktsııadaǵy «Dene shynyqtyrý jáne sport týraly» zań jobasynda jalpy bilim beretin mektepterde mamandandyrylǵan sport synyptary men toptaryn qurý týraly norma qamtylyp otyr. Atalǵan norma sport rezervin daıyndaý maqsatynda engizilgen. Búgin Májiliste QR Sport jáne dene shynyqtyrý agenttiginiń tóraǵasy Tastanbek Esentaev osylaı málimdedi.
Agenttik basshysynyń aıtýynsha, mundaı tereńdetilgen oqý-jattyǵý úderisine negizdelgen synyptar men toptarda oqýshylar sporttyq sheberligin shyńdaıtyn bolady.
«Sonymen qatar, zań jobasynda stýdentter men mektep lıgalaryn damytý maqsatynda bilim berý uıymdaryna sport klýbtary men federatsııalar qurý quqyǵy beriledi. Áskerı qyzmetshiler men quqyq qorǵaý organdarynyń jáne arnaıy memlekettik organdardyń qyzmetkerleri arasynda sportty odan ári damytý úshin olardyń daıarlyǵyn kózdeıtin jáne atalǵan tulǵalardy tıisti normatıvtermen qamtamasyz etý, komandalar qalyptastyrý tártibin kózdeıtin normalar da qamtylǵan», - deıdi Tastanbek Esentaev.
Budan bólek, jańa qujatta múgedekter sportynyń erekshelikterin eskere otyryp, tıisti qoǵamdyq birlestikterdiń sport túrleri boıynsha baǵdarlamalaryn ázirleý qarastyrylady. Sondaı-aq, azamattardyń barlyq sanattary arasyndaǵy teńdeı quqyqty qamtamasyz etý maqsatynda túzeý mekemelerindegi dene shynyqtyrý men sport týraly arnaıy bap engizilgen.
«Sport rezervi týraly taraý tolyǵymen jańadan jazyldy. Sportshylardyń quqyqtary men mindetteri belgilendi. Sport uıymdarynda sportshylardyń jasyn reglamentteýge múmkindik beretin normalar engizildi. Budan bólek, sportshylardy tirkeý máselesi de qarastyrylyp otyr. Bul óz kezeginde sportshylardy ǵana emes, olardyń jattyqtyrýshylaryn da esepke alýǵa múmkindik beredi. Sportshylardyń oqý-jattyǵý sabaqtarynan bastap joǵarǵy sporttyq nátıjege qol jetkizgenge deıingi jolyn baqylaýǵa jaǵdaı týǵyzady», - deıdi agenttik basshysy T. Esentaev.
