Mektepterde L.Petersonnyń avtorlyǵymen shyqqan matematıkadan oqý quralyn paıdalanýdyń zańdylyǵy tekseriledi
ASTANA. QazAqparat - Astana mektepterinde L.Petersonnyń avtorlyǵymen shyqqan matematıkadan oqý quralyn paıdalaný máselesi tekseriledi. Bul týraly búgin Ortalyq kommýnıkatsııalar qyzmetindegi brıfıngte QR Bilim jáne ǵylym vıtse-mınıstri Tahır Balyqbaev málim etti.
Brıfıng barysynda vıtse-mınıstrge «Astananyń kóp mektepterinde L.Peterson esimdi avtordyń matematıkadan qosymsha sabaǵy júrgiziledi. Soǵan aı saıyn 10-15 myń teńge kóleminde balalardan aqsha alady. Al basqa pánder oqytylmaıdy. Osy oraıda Reseıde shyqqan kitaptyń bizdiń balalarǵa kerek pe?» degen saýal qoıyldy.
«Bul suraǵyńyz óte durys. Bizde mınıstrlikte mekteptegi oqý úrdisinde paıdalanatyn arnaıy qosymsha oqý quraldary men oqýlyqtar bekitilgen. Men jańaǵy atalǵan avtordyń oqý quraly bul tizimge kirgenin nemese kirmegeni jaıynda qazir naqty aıta almaımyn. Óıtkeni onyń tizimi óte úlken. Biraq eger sonyń ishine engen bolsa, bizdiń mektepter ony paıdalanýǵa bolady, biraq aqyly túrde emes. Sol sebepti bul aqparatty qosymsha tekserip, bilýimiz kerek», - dedi T.Balyqbaev.
Onyń sózine qaraǵanda, memlekettik bilim standartynyń negizinde orta bilim aqysyz júrgiziledi.
«Eger olar standarttan tys qosymsha sabaq retinde arnaıy olımpıadaǵa nemese basqa bilim saıystaryna daıarlaýǵa qajet bolsa, onda ol basqa másele. Sondyqtan bul máseleni naqtyraq tekserip kóremiz», - dedi QR Bilim jáne ǵylym vıtse-mınıstri Tahır Balyqbaev.
