Mektepterde kúrdeli jóndeýdi qarjylandyrý basqasha júrgiziledi - BǴM

ASTANA. QazAqparat - QR Bilim jáne ǵylym mınıstri Kúlásh Shámshıdınova mektepterdi qarjylandyrýdyń jańa júıesi týraly aıtty, dep xabarlaıdy QazAqparat tilshisi.

Mınıstrdiń aıtýynsha, mektep qurylysy men kúrdeli jóndeýdi qarjylandyrýdyń jańa metodıkasy engiziledi. "Qarjynyń kólemi oqýshylardyń kontıngentine qaraı anyqtalady. Al qaı jerde mektep salý qajettigin sheshý jergilikti atqarýshy organdardyń quziretine beriletin bolady. Barlyq deńgeıdegi bilim berý baǵdarlamalary zaman talabyna saı ózektendirilip otyrady", - dedi K.Shámshıdınova Úkimettiń búgingi otyrysynda.

Aıta keteıik, otyrysta QR Prezıdenti Nursultan Nazarbaevtyń "Nur Otan" partııasynyń XVIII sezinde bergen tapsyrmalary talqyǵa salyndy. QR Bilim jáne ǵylym mınıstri Kúlásh Shámshıdınova bilim salasynda 500 myńǵa tarta adamnyń jalaqysyn kóterýdi kózdeıdi.

"Bilim berý salasyndaǵy jalaqysy tómen qyzmetkerlerdiń eńbekaqysyn ulǵaıtý dıfferentsıaldy túrde 30 protsentke deıin júzege asatyn bolady. Bilim salasynda 500 myńǵa tarta adamnyń jalaqysy ósedi dep kútilýde. Olardyń qatarynda mektepke deıingi uıymdar men ınternattardyń tárbıeshileri, olarlyń kómekshileri, metodıster, áleýmettik pedagogtar, balabaqsha men kolledj psıxologtary, qosymsha bilim berý uıymdarynyń qyzmetkerleri, kitapxanashylar, vojatyılar, býxgalterler, is júrgizýshiler, eden jýýshylar, kúzetshiler, ot jaǵýshylar, santexnıkter men elektrıkter sııaqty basqa da texnıkalyq qyzmetkerler bar. Qazirgi kezde QR Eńbek jáne xalyqty áleýmettik qorǵaý mınıstrligimen qyzmetkerlerdiń sanattaryn jáne jalaqysyn arttyrý kólemin naqty anyqtaý jumystary júrgizilýde", - deıdi K.Shámshıdınova.

Budan bólek, jańa mınıstr bilim reformasy týraly aıtty.