Mektepterde qurdastaryna teris yqpal etetin 1 800 beıresmı «kóshbasshy» anyqtaldy

ASTANA. KAZINFORM — Jyl basynan beri balasy túngi ýaqytta baqylaýsyz júrgeni úshin 107 myń ata-ana jaýapkershilikke tartyldy. Bul týraly Іshki ister mınıstri Erjan Sádenov aıtty.

- Jasóspirimder qylmysynyń aldyn alý qamtamasyz etilip jatyr. Ashyǵyn aıtaıyq, bul salada problema az emes. Bıyldyń ózinde 1 600 qylmys tirkeldi. Kóbisi – urlyq, buzaqylyq, tonaý, esirtki qylmystary. Basty sebep – ata-ana baqylaýy joq. Túnde baqylaýsyz júrgen balalar úshin 107 myń ata-ana, 1 900 oıyn-saýyq mekeme ıesi jazalandy. 4 200 qaraýsyz bala Beıimdeý ortalyǵyna jetkizildi, - dedi Erjan Sádenov ІІM-de ótip jatqan Úkimet saǵatynda.

Sondaı-aq ol 5 100 bala jáne mindetin júıeli oryndamaıtyn 6 400 ata-ana esepte turǵanyn aıtty.

- Mektepterge ıývenaldyq polıtsııa, ýchaskelik jáne jedel qyzmetkerler bekitilgen. Túsindirý jumysy júrgizilýde. 73 myń sabaq ótkizildi. Qurdastaryna teris áser etetin 1 800 beıresmı «kóshbasshy» anyqtaldy. Olarmen jumys barysynda qorqytyp aqsha alýdyń 59 faktisin anyqtap, jolyn kestik. Ótken jylǵy túzetýler aıasynda býllıng úshin 256 quqyq buzýshy jaýapqa tartyldy, - dedi ol.

Aıta keteıik, jyl basynan bergi 9 aıda esirtkini jasyryn taratýmen aınalysqan 61 jasóspirim ustaldy.