Mektepterde koronavırýstyń taralýyna jol bermeý úshin ne isteý kerek

NUR-SULTAN. QazAqparat – Nur-Sultan qalasynyń bas memlekettik sanıtar dárigeriniń orynbasary Janna Pralıeva elordadaǵy koronavırýsqa qatysty jaǵdaıdy baıandady, dep habarlaıdy QazAqparat tilshisi.

«Qalada oqý jyly dástúrli formatta bastalǵany belgili. COVID-19 indetiniń taralýyna tosqaýyl qoıý úshin birqatar shara qabyldandy, ıaǵnı elordadaǵy barsha oqý oryndary Ashyq jobasyna qosyldy jáne muǵalimderdiń 99 paıyzy vaktsına aldy», - dedi J. Pralıeva.

Onyń aıtýynsha, pedagogtar, personal, ata-analar, stýdentter balabaqsha men mektepterge, kolledjderge, ýnıversıtetterge Ashyq jobasy men basqa da qosymshalar arqyly ótedi.

«Maska taǵý rejımin oqý kabınetteri men úzilis kezinde de saqtaý kerek», - dedi Janna Pralıeva.

Eske sala keteıik, QR DSM Sanıtarlyq-epıdemıologııalyq baqylaý komıtetiniń tóraǵasy Aıjan Esmaǵambetova mektepte Ashyq-pen pedagogtar men tehnıkalyq personal kiretinin aıtty.