Mektepterde koronavırýsty anyqtaıtyn test qoldanylýy múmkin

ALMATY. QazAqparat - Almaty qalasynyń bas memlekettik sanıtarlyq dárigeri Jandarbek Bekshın mektepterde koronavırýsty anyqtaıtyn ekspress-test qoldanýdy usyndy, dep habarlaıdy QazAqparat tilshisi.

Onyń aıtýynsha, ekspress-test adam aǵzasynda koronavırýstyń bar-joǵyn anyqtaýǵa óte tıimdi.

«Biz tiri vırýs pen mýtatsııalanǵan shtamdarǵa zertteý júrgizdik. Qazaqstanǵa ákelinip, tirkeýden ótken barlyq negizgi ekspress-testerdi zerttep, jaqsy nátıje aldyq. Búginde ekspress-testileýdiń tıimdiligi óte joǵary», - dedi Jandarbek Bekshın OKQ-da ótken baspasóz máslıhatynda.
Spıkerdiń sózinshe, mundaı testter qazirdiń ózinde Reseıde qoldanyla bastaǵan. Al kelesi aptanyń sońyna deıin qazaqstandyq mamandardyń ekspress-tester boıynsha zertteýleri Densaýlyq saqtaý mınıstrligine joldanady.
«Biz mektepterde naýqastarmen baılanysta bolǵan myńdaǵan adamdy baıqap otyrmyz. Olardyń barlyǵyn ekspress-testi qoldanyp, tekserip kórýge bolady. Olardyń kómegimen, 15-20 mınýt ishinde oqýshynyń oqýyn jalǵastyratynyn nemese oqshaýlanýǵa jiberý qajettigin anyqtaýǵa bolady», - deıdi ol.
Sonymen qatar, Jandarbek Bekshın bul bıýdjettik qarajattyn únemdeýge, sondaı-aq medıtsına qyzmetkerlerine túsetin júktemeni azaıtýǵa múmkindik beretinin tilge tıek etti.