Mektepterde «Konstıtýtsııa negizderi» men «Zań men tártip» kýrstary oqytylady
ASTANA. KAZINFORM — Qazaqstan mektepteriniń oqý baǵdarlamasyna «Konstıtýtsııa negizderi» jáne «Zań men tártip» kýrstary engiziledi.
Memleket basshysy bul pánder jastarǵa Konstıtýtsııany qurmettep, zań talaptaryn saqtaýdyń mańyzyn túsindirýge baǵyttalatynyn aıtty.
Prezıdent oqý baǵdarlamalary men oqýlyqtardy jańa Konstıtýtsııanyń ıdeıalaryna sáıkestendirýdi tapsyrdy.
Prezıdent tapsyrmasymen osy jyldan bastap mektepterde «Quqyq negizderi» páni oqytylatyn boldy. Budan bólek, oqý baǵdarlamasyna «Konstıtýtsııa negizderi» jáne «Zań men tártip» kýrstary engiziledi.
— Tek zańdy saqtaıtyn, Konstıtýtsııany syılaıtyn jastar ǵana jarqyn keleshekke, mol tabysqa qol jetkizedi, túsinikti tilmen aıtsaq, baqytty ómir súredi. Al zańǵa nemquraıly qaraıtyn, zań erejelerin buzyp júrgen jastar qylmystyq jazasyn alyp, óz ómirine balta shabýda. Ókinishke qaraı, bul óte qarapaıym aqıqatty kóptegen jas azamattar bilmeıdi de, túsinbeıdi de. Bizdiń mindet — olarǵa ómirdiń osy shyndyǵyn túsindirip aıtý, — dedi Qasym-Jomart Toqaev elordada respýblıkalyq Tamyz konferentsııasynda.
Onyń aıtýynsha, oqýlyqtardyń mazmuny zaman talabyna, sondaı-aq, jańa Konstıtýtsııa ıdeıalaryna saı bolǵany óte mańyzdy.
— Osy mindettiń sapaly ári ýaqtyly oryndalýyna Úkimet pen tıisti mınıstrlik tikeleı jaýapty, — dedi Memleket basshysy.
Buǵan deıin Prezıdent 7 myń bala qant dıabetine shaldyqqanyn aıtyp, fast-fýd jarnamasyn muqııat zerdeleýdi tapsyrǵan edi.
Sondaı-aq Qasym-Jomart Toqaev 16 jasqa tolmaǵandardyń áleýmettik jelide tirkelýine tyıym salý týraly zań jobasyn Quryltaıda qaraýdy usynyp, balalarǵa arnalǵan SIM-kartalardy engizýdi tapsyrdy.
