Mektepterde qoldanystaǵy 173 oqý ádebıeti tyńǵylyqty saraptamadan ótti - «Mıras» keńesi
ASTANA. QazAqparat - Mektepterde qoldanystaǵy 173 oqý ádebıeti tyńǵylyqty saraptamadan ótti.
Bul týraly búgin «Nur Otan» partııasy janyndaǵy «Mıras» qoǵamdyq keńesiniń memlekettik tildi oqytý, qazaq tilindegi oqýlyqtar máselesi taqyrybyndaǵy keńeıtilgen otyrysynda Qazaq memlekettik qyzdar pedagogıkalyq ýnıversıtetiniń rektory Dınar Nóketaeva málim etti.
Onyń sózine qaraǵanda, bıyl «Mıras» keńesi janynan Qazaq memlekettik qyzdar pedagogıkalyq ýnıversıtetiniń ǵalym-pedagogtarynan turatyn qazaq tilindegi oqýlyqtar men oqý-ádistemelik materıaldardy saraptaý jónindegi jumys toby quryldy. Jumys toby músheleri «Almatykitap», «Mektep», «Atamura», «Arman PV», «Jazýshy» baspalarynan shyǵarylǵan, qoldanystaǵy 173 oqý ádebıetine saraptama jasaldy.
«Jalpy alǵanda «Almatykitap» baspasynyń 40 oqý ádebıetine, «Atamura» - 53, «Mektep» - 64, «Arman PV» baspasynyń 10 oqý ádebıetine jáne jeke baspalarda basylyp shyqqan 6 oqýlyq qamtyldy. Saraptama júrgizý barysynda normatıvtik qujattarǵa sáıkestigine baılanysty keıbir oqýlyqtardyń tıptik oqý baǵdarlamasyna sáıkessizdigi anyqtaldy, ıaǵnı 173 oqýlyqtyń 20-sy sáıkes bolmaı shyqty. Al taqyryptarda aýytqýlardyń kezdesýi 14 oqýlyqta oryn alsa, oqý baǵdarlamasyn tolyq qamtymaýy 23 oqýlyqta anyqtaldy»,-dedi D. Nóketaeva.
Sonymen qatar ol oqýlyqtyń mazmundyq jaǵyna baılanysty ǵylymnyń qazirgi damý deńgeıine oqý materıalynyń sáıkessizdigi 173 oqýlyqtyń ishinde 14-inde kezdesti. Taqyrypqa baılanysty derekter, aqparattardyń jańartylyp kórsetilmegendigi - 11 oqýlyqta, oqý materıalynyń keńinen, logıkaly, birizdi, júıeli baıandalmaýy - 22 oqýlyqta, ǵylymı túsinikter, termınder, erejeler, zańdardyń qazaq tilinde durys jáne dáleldi ashylmaýy, hımııa, fızıka, matematıka, ınformatıka, algebra, geometrııa, astronomııa pánderi boıynsha formýlalardyń, reaktsııalardyń, esepterdiń berilýindegi qatelerge jol berilýi 54 oqýlyqta oryn aldy.
