Mektepterde qoqysqy suryptaıtyn eko-boks qoıylady — pılottyq joba
ASTANA. KAZINFORM — Elorda men Jezqazǵannyń 129 mektebinde qoqysty bólek jınaý úshin bir myńnan astam eko-boks ornatylady. Bul týraly Ekologııa jáne tabıǵı resýrstar mınıstri Erlan Nysanbaev málim etti.
— Bizdiń mınıstrliktiń pılottyq jobasy aıasynda jańa oqý jylyna deıin Astana men Jezqazǵannyń 129 mektebinde qoqysty suryptap jınaý úshin 1 myńnan astam eko-boks ornatylady. Qatty turmystyq qaldyqtardyń kómý kólemin azaıtý maqsatynda olardy suryptaý jáne qaıta óńdeý jobalaryn iske asyrý mańyzdy. Osy baǵyttaǵy jobalardy qarjylandyrýdy arttyrýǵa qatysty premer-mınıstrdiń tapsyrmasyna sáıkes árbir jobaǵa mınıstrlikten jaýapty qyzmetkerler bekitildi, — dedi Erlan Nysanbaev Úkimet otyrysynda.
Mınıstrdiń málimdeýinshe, búginde 1,1 mln tonnaǵa deıin qoqys-qaldyqty óńdeýge múmkindik beretin 62 joba maquldandy.
— Onyń ishinde 13 joba 52,7 mlrd teńgege qarjylandyryldy. Sonymen qatar 74,5 mlrd teńge turatyn 21 joba ónerkásipti damytý qorynyń sońǵy satysynda qaralyp jatyr. Qarjylandyrylǵan jobalar iske asyrý satysyna ótti, qazir jabdyq ornatylyp jatyr. Ekologııalyq jobalardy iske asyrý jergilikti atqarýshy organdar men ınvestorlardyń belsendi jumysyn talap etedi. Óńir ákimdikteri jobalardy tolyq iske qosqanǵa deıin súıemeldeý qajet, — deıdi ol.
Buǵan deıin Ekologııa mınıstri qazaqstandyqtar qandaı ekologııalyq problemalarǵa jıi shaǵymdanatynyn aıtty.