Mektepterde qaýipsizdikti kúzet uıymdary qamtamasyz etedi – ІІM ókili

ASTANA. KAZINFORM – Mektepterde qarýdy alyp kirýge baılanysty jaǵdaıǵa qatysty málimdeme Іshki ister mınıstrligi Ákimshilik polıtsııa komıteti tóraǵasynyń orynbasary Ǵalym Sarǵulov jasady. 

– Bul másele birinshi kezekte Oqý-aǵartý mınıstrliginiń qaraýynda, ıaǵnı mektepterde qarýdy jáne kesetin zattardy alyp kirýge jol bermeý sharalaryn qamtamasyz etý – olardyń quzyretinde. Biz óz tarapymyzdan, Іshki ister mınıstrligi retinde, bul protsestiń qalaı júzege asyrylýy tıis ekenin usyndyq, - dedi spıker. 

Ǵalym Sarǵulov atap ótkendeı, mektepterde qaýipsizdikti qamtamasyz etý úshin kúzettik uıymdarmen jumys uıymdastyrylǵan. Qyzmetkerler qalaı áreket etý keregin birneshe ret nusqaýlyqtarmen túsindirdi, jınalystar ótkizildi. Alaıda, bul máselede sheshýshi ról mektep dırektorlaryna tıesili. Olar qandaı kúzet uıymyn jaldaıtynyn, kelisimsharttyń sharttaryn, normalardy jáne erejelerdi ózderi belgileıdi. 

– Osyǵan qaramastan, mektepterdegi qylmystyq jaǵdaılar tómendegen. Eger, mysaly, 2001 jyly kámeletke tolmaǵandardyń qatysýymen 8 myńnan astam qylmys tirkelgen bolsa, ótken jyly bul kórsetkish 2 400-ge deıin tómendedi. Olardyń ishinde mektep ishinde tirkelgen qylmystar sany – bar-joǵy 34, - dedi Ǵalym Sarǵulov.

Buǵan deıin Atyraý oblysy Qulsary qalasynda qatarlastaryn baltamen qýalaǵan oqýshyǵa qatysty alǵashqy sot otyrysy ótti. Sottyń sheshimimen bala úıqamaqta ekenin jazǵanbyz.