Mektepterde Face ID júıesi jappaı engizilýi múmkin
ASTANA. KAZINFORM — Mektepterde Face ID tehnologııasy arqyly kirýdi baqylaý júıesin jappaı engizý máselesi qarastyrylyp jatyr. Bul júıe oqýshylardyń sabaqqa qatysýyn avtomatty túrde esepke alyp, bilim berý uıymdarynyń qaýipsizdigin arttyrýǵa baǵyttalǵan. Bul másele Úkimette talqylandy.
Qazaqstan Respýblıkasy Premer-mınıstriniń birinshi orynbasary Nurlybek Nálibaev Ulttyq bilim berý derekter qoryn jańǵyrtý, bilim berý salasyn tsıfrlandyrý, memlekettik qarjylandyrýdyń tıimdiligin arttyrý máseleleri boıynsha keńes ótkizdi. Jıynǵa oqý-aǵartý mınıstri Juldyz Súleımenova, oblystardyń jáne Astana, Almaty, Shymkent qalalary ákimderiniń orynbasarlary qatysty.
Oqý-aǵartý mınıstrligi «Qazaqtelekom» AQ-men biresip óńirlerdi Ulttyq bilim berý platformasyna kezeń-kezeńimen qosý josparyn ázirledi. Servısti qoldanysqa engizý memlekettik qyzmetterdi avtomattandyrýǵa, derekterdiń dáldigin arttyrýǵa, bıýdjet qarajatyn paıdalanýdyń ashyqtyǵyn qamtamasyz etýge baǵyttalǵan.
Mektepke deıingi uıymdardy qarjylandyrý tetikterin jetildirý máselelerine nazar aýdaryldy. Atap aıtqanda, memlekettik bilim berý tapsyrysynyń qunyn esepteýdiń biryńǵaı ádistemesin engizý jónindegi usynys qaraldy.
Osyǵan baılanysty bilim berý qyzmetterin kórsetýge jumsalatyn shyǵyndardyń óńirlik erekshelikteri men aıyrmashylyqtaryn eskeretin, ekonomıkalyq turǵydan negizdelgen túzetý koeffıtsıentterin qoldana otyryp, bir tárbıelenýshige shaqqandaǵy memlekettik bilim berý tapsyrysynyń bazalyq qunyn respýblıkalyq deńgeıde belgileý múmkindigin pysyqtaý tapsyryldy.
— Bilim berý uıymdarynda Face ID tehnologııasyn paıdalana otyryp, kirýdi baqylaý júıelerin jappaı engizý qajettigi atalyp ótti. Mundaı júıelerdi qoldaný qaýipsizdik deńgeıin arttyrýǵa, bilim alýshylardyń oqýǵa qatysýyn esepke alýdy avtomattandyrýǵa, bilim berý uıymdarynyń aýmaǵyna kirýdi baqylaýdy qamtamasyz etýge baǵyttalǵan. Keńes qorytyndysy boıynsha memlekettik organdar men ákimdikterge bilim berý salasyn odan ári tsıfrlandyrý, bıýdjet qarajatyn paıdalaný tıimdiligin arttyrý jóninde tapsyrmalar berildi, — delingen habarlamada.
Osyǵan deıin Qostanaı oblysynda mektep oqýshylarynyń jeke derekteri ashyq jarııalanǵany belgili boldy.
