Mektepterde býllıngti azaıtqan «DosbolLIKE» baǵdarlamasy endi búkil elge engiziledi
ASTANA. KAZINFORM — Elimizdiń 9 óńirinde mektepte býllıngtiń aldyn alýǵa jáne ony azaıtýǵa baǵyttalǵan otandyq «DosbolLIKE» baǵdarlamasynyń aprobatsııasy sátti aıaqtaldy, dep habarlaıdy Oqý-aǵartý mınıstrligi.
Elimizdiń 9 óńirinde mektepte býllıngtiń aldyn alýǵa jáne ony azaıtýǵa baǵyttalǵan otandyq «DosbolLIKE» baǵdarlamasynyń aprobatsııasy sátti aıaqtaldy. Baǵdarlamaǵa elimizdegi 50 mektepten shamamen 70 myń oqýshy men 5,5 myńnan astam pedagog qatysty.
Baǵdarlamany júzege asyrý birneshe kezeńnen turdy: qazirgi ahýaldy dıagnostıkalaý, mektepishilik býllıngtiń aldyn alý júıesin qurý, pedagogterdi oqytý jáne ata-analardy tartý. Árbir mektep dıagnostıkanyń nátıjelerine súıene otyryp, barlyq qatysýshylardyń — oqýshylar, muǵalimder men ata-analardyń qatysýymen býllıngke den qoıýdyń óz modelin qalyptastyrdy.
Aprobatsııa qorytyndysy boıynsha oqýshylar men pedagogter arasynda júrgizilgen saýalnamalar mektep ortasynda aıtarlyqtaı oń ózgerister bolǵanyn kórsetti. Atap aıtqanda, 2025 jyly býllıngke qatysýshy agressorlardyń (býllerlerdiń) úlesi 2024 jylmen salystyrǵanda 1,5%-ǵa tómendedi. Sonymen qatar, ózderin jábirlenýshi sezinetin oqýshylardyń (vıktımderdiń) sany 5,4%-ǵa azaıdy. Buǵan qosa, senim arta alatyn, syryn bólise alatyn eresek tálimgeri bar balalardyń sany úsh ese ósken.
— Aprobatsııa barysynda júıeli tásildiń jáne barlyq taraptyń — oqýshylardyń, pedagogterdiń, ata-analardyń belsendi qatysýynyń tıimdiligi dáleldendi. Biz tek janjaldar sanynyń azaıǵanyn ǵana emes, sonymen qatar mektep qaýymdastyǵy ishindegi senim men qoldaýdyń artqanyn kórip otyrmyz. Bul — qaýipsiz ári qoldaýshy orta qalyptastyrýdyń basty sharty, — deıdi QR Oqý-aǵartý mınıstrligi Balalardyń quqyqtaryn qorǵaý komıtetiniń tóraǵasy Nasymjan Ospanova.
Aıta keteıik, býllıngke qarsy baǵyttalǵan «DosbolLIKE» baǵdarlamasy 2025 jylǵy 1 qyrkúıekten bastap elimizdegi barlyq mektepter men kolledjderde engizile bastaıdy. Qazirgi ýaqytta ony aýqymdy túrde iske asyrý úshin daıyndyq jumystary júrgizilip jatyr.
Buǵan deıin Oqý-aǵartý mınıstri Ǵanı Beısembaev mektepter bir aýysymdy oqytý júıesine qadam basqanyn aıtqan edi.