Mektepterde balalar ádebıeti onkúndigi ótip jatyr
ASTANA. KAZINFORM — Elimizdiń bilim berý uıymdarynda «Adal azamat» birtutas tárbıe baǵdarlamasy aıasynda «Balalar kitaphanasy» jobasyn júzege asyrý jalǵasyp jatyr. Bul shara sheńberinde bilim berý uıymdarynda balalar ádebıeti onkúndigi bastaldy.
Oqý-aǵartý mınıstrligi baspasóz qyzmetiniń málimetinshe, aýqymdy mádenı-aǵartýshylyq bastama oqýshylardyń kitap oqýǵa qyzyǵýshylyǵyn arttyrýǵa, ǵylymı-tanymdyq jáne kórkem ádebıet arqyly rýhanı-adamgershilik qundylyqtardy qalyptastyrýǵa, sondaı-aq balalardyń shyǵarmashylyq jáne zııatkerlik áleýetin damytýǵa baǵyttalǵan.
— Onkúndik aıasynda mektepterde kitap kórmeleri, ádebı kezdesýler, ertegi oqý saǵattary, shyǵarmashylyq baıqaýlar, pikirtalastar jáne otbasylyq oqý mádenıetin nasıhattaıtyn túrli formattaǵy tárbıelik-tanymdyq is-sharalar uıymdastyrylyp keledi, — delingen habarlamada.
Sonymen qatar, bastama mektep kitaphanasynyń bilim berý úderisindegi rólin arttyrýǵa, kitaphanashylar, muǵalimder, oqýshylar men ata-analar arasyndaǵy ózara yntymaqtastyqty nyǵaıtýǵa múmkindik beredi.
Joba aıasyndaǵy is-sharalarǵa 1–11 synyp oqýshylary, mektep kitaphanashylary, pán muǵalimderi, synyp jetekshileri jáne ata-analar qatysady.
Aıta keteıik, atalǵan onkúndik balalar ádebıetiniń úzdik úlgilerin keńinen nasıhattaýǵa, oqýshylardyń sóıleý mádenıeti men shyǵarmashylyq oılaýyn damytýǵa, sondaı-aq otbasylyq kitap oqý dástúrin qalyptastyrýǵa baǵyttalǵan mańyzdy mádenı-aǵartýshylyq bastama bolmaq.
Osyǵan deıin «Adal azamat» birtutas tárbıe baǵdarlamasyn kórneki súıemeldeý maqsatynda zamanaýı brendbýk ázirlengenin jazdyq.