Mektepterde ata-analar jınalysy ótti
NUR-SULTAN. QazAqparat - 2020-2021 oqý jylyna daıyndyq aıasynda mektepter ata-analar jınalysyn ótkizdi. QR Bilim jáne ǵylym mınıstrliginiń málimetine qaraǵanda, onda bıylǵy oqý jylynyń erekshelikteri talqylanǵan, dep habarlaıdy QazAqparat.
Mektep ákimshiligi men synyp jetekshileri ata-analarǵa oqý jylynyń balasy oqıtyn mektepte qalaı bastalatynyn egjeı-tegjeıli túsindirip, suraqtarǵa jaýap berdi.
«Onlaın jıyn barysynda synyp jetekshiler oqýshylarynyń ata-analaryna qazirgi epıdemıologııalyq jaǵdaıda mekteptiń qandaı oqytý formatyn tańdaǵanyn túsindirdi. Jańa oqý jyly qashyqtan bilim berý formatynda bastalady. Ata-analardyń tilekteri men ótinishteri boıynsha bastaýysh synyp oqýshylary mektepke baryp oqı alady. Bul rette bilim alýshylar men pedagogterdiń dene qyzýy kún saıyn ólshenetin bolady. Kezekshi synypta sozylmaly aýrýlary joq balalar ǵana bilim ala alady (ótinishte kórsetiledi).
Bir synypta oqýshy sany 15-ten aspaıtyn bolady. Ótinishterdi synyp jetekshileri qoljetimdi baılanys quraldary arqyly qabyldaıdy. «Kezekshi synypqa» qabyldaý 25 tamyzda bastalady», delingen habarlamada.
Budan bólek, sanıtarlyq-epıdemıologııalyq jaǵdaıy qolaıly aýyldyq eldi mekenderde oqý protsesi sanıtarlyq qaýipsizdik sharalaryn saqtaı otyryp, dástúrli formatta júrgiziletin bolady.
«Ata-analar balalardy mektepke alyp kelip, úıine ózi alyp ketýi kerek. Kezekshi synyptarda sabaqtyń uzaqtyǵy 40 mınýt. Sabaq arasyndaǵy úziliste ár synypqa ár túrli ýaqytta beriledi. Árbir ekinshi sabaqtan keıin kabınetterde jáne ár úzilisten keıin, aýysymdar arasynda, dálizderde, holdarda ylǵaldy tazartý jumysy júrgiziledi. Mektep ashanasy men býfettiń qyzmeti ýaqytsha toqtatyldy. Bilim berý uıymdary zalalsyzdandyrýǵa arnalǵan quraldarmen, aıaq kıimdi zararsyzdandyrýǵa arnalǵan kilemshelermen, sanıtaızerlarmen qamtamasyz etiledi», delingen habarlamada.
Mektep formasyna qoıylatyn talaptar joıylmaıdy, biraq tıisti buıryqqa ýaqytsha ózgertildi. ıAǵnı ata-ana jańa oqý jylynda (1 qyrkúıekten bastap 25 mamyrǵa deıin) balasyn mektepke mektep formasymen nemese basqa yńǵaıly kıimmen jiberýge qatysty sheshimdi ózi qabyldaıdy.
Shaǵyn jınaqty mektepterde oqıtyn oqýshylardyń ata-analaryna da sanıtarlyq sharalardy saqtaý qajettiligi týraly aıtyldy.
Sondaı-aq búgin balalary qashyqtan oqıtyn ata-analar úshin bilim berý platformalarynyń múmkindikteri kórsetildi. Aıta keteıik, Bilim jáne ǵylym mınıstrligi qandaı da bir bilim berý ınternet platformasyn tańdaýǵa qatysty sheshim qabyldamaıdy. Árbir mektep qashyqtan oqytýdy uıymdastyrýǵa negiz bolatyn ınternet platformany ózi tańdaıdy.
Ótken oqý jylynyń tórtinshi toqsanyndaǵydaı, dúısenbiden jumaǵa deıin «Balapan» jáne «El-Arna» respýblıkalyq telearnalarynda qosymsha bilim berý resýrsy retinde paıdalaný úshin telesabaqtar kórsetiledi.
Sonymen qatar karantındik jáne shekteý sharalary jaǵdaıynda 1-11(12) synyptarda oqý jetistikterin baǵalaý júıesine qatysty ýaqytsha ózgerister engizildi. Jańa oqý jylynda toqsan saıyn bólim úshin 1 jıyntyq jumys jáne toqsan úshin 1 jıyntyq jumys júrgiziledi. Toqsandyq baǵalaý kúndelikti baǵalaý, BJB jáne TJB kórsetkishteri negizinde shyǵarylatyn bolady.
