Mektepterde 860-tan astam stomatologııalyq kabınet ashylady

ASTANA. KAZINFORM — Aldaǵy 3 jylda mektepterde 860-tan astam stomatologııalyq kabınet ashylady. Bul týraly Úkimet otyrysynda Densaýlyq saqtaý mınıstri Aqmaral Álnazarova aıtty.

- 2028 jylǵa deıin jalǵasatyn «Bolashaqqa saý tispen» joba aıasynda byltyr mektepterde 125 stomatologııalyq kabınet ashyldy. Osy tusta, Shyǵys Qazaqstan oblysy men Ulytaýda birde-bir kabınet ashylmaǵan, al Astana qalasynda josparlanǵan 30 kabınettiń tek 5-ýi ǵana ashylǵan.

Aldaǵy 3 jyl ishinde qosymsha 862 kabınet ashý josparlanýda. Óńir basshylarynan osy máseleni baqylaýǵa alýdy suraımyn, - dedi mınıstr.

Onyń dereginshe, búginde 3500-ǵa jýyq mektep qatysatyn balalardyń densaýlyǵyn nyǵaıtý úshin «Salamatty mektep» jobasy iske asyrylýda.

- Alaıda, osy bastamaǵa óńirlerdegi mektepterdiń az tartylýy baıqalady. Atap aıtqanda, Almaty oblysynda - 432 mektepten tek 20-sy, Aqmola oblysynan 520-dan 23-i ǵana, Jetisýdan 315-ten 20-sy, al Mańǵystaý oblysynda 172 mektepten 21-i ǵana qatysyp otyr, - dedi Aqmaral Álnazarova. 

Buǵan deıin balalardyń densaýlyǵyn qorǵaý úshin qandaı mańyzdy sheshimder qabyldanǵanyn jazǵan edik.