Mektepterde 2-4-synyp oqýshylarynyń aralyq baǵalaýy ótedi
ASTANA. KAZINFORM — 23-30 qyrkúıek aralyǵynda mektepterde 2-4-synyp oqýshylary úshin alǵashqy aralyq baǵalaý kezeńi ótedi.
2026-2027 oqý jylynda 2-4-synyptarda formatıvtik jáne aralyq baǵalaý qatar júrgiziledi. Baǵalaýdyń bul eki túri bir-birin tolyqtyrady jáne oqý protsesi barysynda qatar qoldanylady.
Aralyq baǵalaý oqý baǵdarlamasynyń aıaqtalǵan bólimderi boıynsha júrgiziledi. Baǵalaý formaty pánge baılanysty:
qazaq tili nemese orys tili — dıktant jáne oqý saýattylyǵyna arnalǵan tapsyrmalar. Oqýshynyń mátindi saýatty jazýy jáne onyń mazmunyn túsinýi baǵalanady;
ádebıettik oqý — shyǵarma nemese mazmundama jáne oqý saýattylyǵyna arnalǵan tapsyrmalar. Mátindi túsiný, negizgi oıdy anyqtaý jáne óz oıyn júıeli jetkizý eskeriledi;
matematıka — baqylaý jumysy. Esepteý daǵdylarymen qatar, eseptiń shartyn túsiný, sheshý jolyn durys tańdaý jáne jaýabyn negizdeı alý baǵalanady.
Oqý-aǵartý mınıstrliginiń málimetinshe bir aralyq baǵalaý jumysynyń uzaqtyǵy — 40 mınýt. Eń joǵary ball: 2-synypta — 12, 3-synypta — 14, 4-synypta — 16 ball.
— Formatıvtik baǵalaý toqsan boıy jalǵasady. Pedagog ár oqýshyny ótkizilgen sabaqtardyń keminde 30 paıyzynda baǵalap, toqsanǵa josparlanǵan oqý maqsattarynyń keminde 50 paıyzyn qamtýy tıis. Nátıje 1-10 baldyq shákil boıynsha baǵalanady, — delingen mınıstrlik habarlamasynda.
Kallıgrafııa arnaıy baǵalaý maqsaty bolmasa, oqýshynyń jazý ereksheligi baldy tómendetýge negiz bolmaıdy.
1-synypta baldyq baǵalaý júrgizilmeıdi.
Baǵalaýdyń negizgi maqsaty — oqýshyǵa tek baǵa qoıý emes, onyń oqý materıalyn qanshalyqty meńgergenin anyqtaý, ilgerileýin baqylaý jáne ári qaraı damýyna baǵyt berý. Baǵalaý balanyń alǵa jyljýyna kómektesetin keri baılanys quraly bolýy tıis.
Aıta ketelik birneshe pánnen jyldyq baǵasy «2» bolǵan oqýshy oqý jylyn qaıta oqýǵa qaldyrylady.
