Mektepter jazda bos turmaýy tıis - mınıstr Saǵadıev
ASTANA. QazAqparat - QR Bilim jáne ǵylym mınıstri Erlan Saǵadıevtiń oıynsha, jazǵy ýaqytta balalardyń bos ýaqytyn tıimdi ótkizý úshin mektep ǵımarattaryn barynsha tıimdi paıdalaný qajet. Al qosymsha qyzmetten túsetin qarjyny sol mektepterdiń ózderine qaldyrǵan jón, dep habarlaıdy QazAqparat tilshisi.
«Búginde balalar mektep janyndaǵy lagerlerde tek 10 kún ǵana júre alady. Al kanıkýldardyń merizimi - 90 kún. Bizdińshe, bul jerde úlken rezerv bar. Balalar jaz boıy mektep janyndaǵy sportyq jáne ózge de lagerlerge bara alady. Ol úshin ne isteý kerek? Aldymen tıisti jaǵdaılardy jasaý qajet. Odan keıin kásibı mamandar, eriktiler men stýdentter kerek. Bos kabınetter men zaldar bar. Alaıda osynyń bárin uıymdastyrý úshin «Bilim týraly» zańǵa ózgerister engizý qajet. Sonda mektepter materıaldyq-texnıkalyq bazany ózdigimen paıdalanyp, jaz boıy balalardyń demalysyn uıymdastyra alady. Al qamqorshylyq keńesteri men ata-analar baqylaý sharalaryn júrgizedi», - dedi Saǵadıev Úkimettiń búgingi otyrysynda.
Mınıstrdiń aıtýynsha, mektepterdiń qosymsha qyzmet kórsetkeni úshin túsetin aqyny ózderine qaldyrý qajet. Odan bıýdjetke kóp shyǵyn kelmeıdi.
«Biz osy usynysty respýblıkalyq bıýdjet komıssııasynyń qaraýyna shyǵaramyz. Baqytjan Ábdiruly, sizden qoldaý kórsetýińizdi suraımyz», - dep atap kórsetti mınıstr.
Aıta keteıik, búgin Erlan Kenjeǵalıuly jazǵy kanıkýlda balalardyń demalysyn, bos ýaqyty men olardy jumyspen qamtýdy uıymdastyrý boıynsha esep berdi. Bıyl 1-11 synyp oqýshylarynyń sany 2 mıllıon 671 myń balany qurap otyr. Olardyń jazǵy demalysyn uıymdastyrý úshin respýblıkada 14 myńǵa jýyq densaýlyq lagerleri men alańdar jumys isteıdi. Jazǵy lagerler 1 mıllıon 655 balany, ıaǵnı barlyq oqýshylardyń 61 protsentin qamtı alady.
