Mektepter janynda oıyn avtomattaryn ornatý kóbeıip barady — senator
ASTANA. KAZINFORM — Senator Ǵalıasqar Sarybaev sońǵy ýaqytta «kran» túrindegi oıyn avtomattarynyń kúrt kóbeıip jatqanyn aıtty. Bul jabdyqtar mektepterdiń, úıirmelerdiń, sport sektsııalarynyń mańynda jáne balalar ózderi kiretin dúkenderdiń ishinde jappaı ornatylyp jatyr.
Onyń paıymynsha, osynyń saldarynan balalar oıyn avtomattaryna baratyn negizgi aýdıtorııaǵa aınalyp barady. Balalar bul apparattarǵa mekteptegi túski asqa berilgen aqshalaryn jumsaıdy. Qaýiptiń aıqyn bolýyna qaramastan, atalǵan avtomattar «Oıyn bıznesi týraly» zańnyń retteý aıasyna kirmeıdi, tehnıkalyq standarttarmen belgilenbegen jáne jas shekteýleri joq.
— Sońǵy jyldary «Kran» nemese «Ustap al» dep atalatyn avtomattardyń keńinen taralýy alańdatyp otyr. Mundaı apparattar aqshalaı utys qarastyrylmaǵandyqtan, qumar oıyndary sanatyna jatpaıdy. Zań mundaı avtomattardyń jumys mehanıkasy, utys algorıtmi, jas shekteýleri nemese ornalastyrý talaptaryna qatysty normalardy qamtymaıdy. Sanıtarııalyq normalar, saýda erejeleri, tehnıkalyq reglamentteri men basqa da talaptar belgilenbegen. Olardyń qaýipsizdigin, shyqqan jerin nemese balalarǵa arnalǵan sanıtarııalyq talaptarǵa sáıkestigin tekserýdiń mindetti mehanızmi joq, — dedi Ǵalıasqar Sarybaev óziniń depýtattyq saýalynda.
Senatordyń aıtýynsha, baqylaýdyń bolmaýy bul salaǵa fıskalızatsııadan jáne ashyq eseptilikten jaltarýǵa múmkindik berip, qolma-qol aqsha aınalymynyń baqylaýsyz ósýine ákeledi. Kóp jaǵdaıda balalar júldeni uta almaýy, mehanızmniń túsiniksiz jumysy jáne aqaý kezinde aqshanyń qaıtarylmaýy týraly shaǵymdanady.
Ǵalıasqar Sarybaev bul avtomattarǵa jeke quqyqtyq mártebe berýdi, mindetti sertıfıkattaý men mehanıkalyq tekserýdi engizýdi, jas shekteýlerin belgileýdi, olardy balalar mekemeleri mańynda ornalastyrýǵa tyıym salýdy, sondaı-aq retteý, salyq salý jáne syılyqtardyń sapasyn baqylaý boıynsha memlekettik organdardyń quzyretterin bekitýdi usyndy.
Buǵan deıin qumar oıyndarǵa qatysýǵa tyıym salynatyn azamattardyń tizbesi keńeıtilgenin jazǵan edik.