Mektepter ornalasqan aýdandardy patrýldeýdi kúsheıtý kerek — depýtat

ASTANA. KAZINFORM — Búgin Májilistiń jalpy otyrysynda depýtat Samat Nurtaza bilim berý mekemelerindegi qaýipsizdik máselesin kóterdi. 

— Otandyq bilim berý mekemeleriniń qoǵamdyq qaýipsizdigi halyqty qatty alańdatyp otyr. Sebebi bul — balalardyń, stýdentter men pedagogıkalyq qyzmetkerlerdiń ómiri men densaýlyǵyna tikeleı qatysty másele. Bilim berý mekemelerindegi, ásirese, balabaqshalar men mektepterdegi kúzet jaǵdaıy basa baqylaýdy talap etedi.

Kóp jaǵdaıda mundaı fýnktsııalar formaldy sıpatta ǵana, al is júzinde ony kóbinese zeınet jasyndaǵy adamdar atqaryp júr. Mundaı jaǵdaı kóbine jalaqynyń tómendiginen týyndap otyr. Sonyń saldarynan bul jumysqa bilikti mamandardy tartý qıyn. Budan basqa, bilim berý mekemeleriniń ǵımarattaryna kirý rejımin qamtamasyz etýdiń biryńǵaı tásili joq. Bul óz kezeginde qaýipsizdikke naqty qater tóndiredi, — dedi Samat Nurtaza Premer-mınıstriniń orynbasary Aıda Balaevanyń atyna joldaǵan saýalynda.

Sonymen qatar ol bilim berý mekemeleriniń kóbinde ǵımaratqa tyıym salynǵan zattardyń ótip ketpeýin anyqtaıtyn tehnıkalyq tekserý quraldary, sonyń ishinde metall detektorlar joq ekenin atap ótti.

— Osy aıtylǵandardyń negizinde tıisti máselelerdi qarastyrýdy suraımyn. Birinshiden, menshik nysanyna qaramastan, barlyq bilim berý uıymdary oryndaýǵa tıisti qaýipsizdikti qamtamasyz etýdiń biryńǵaı standarty ázirlenip, engizilýi kerek. Ekinshiden, balabaqshalar men mektepterdiń qaýipsizdigin qamtamasyz etý úshin osy qyzmetti júzege asyrýǵa arnalǵan lıtsenzııasy bar uıymdarmen ǵana shart jasaý qajet. Úshinshiden, elimizdiń barlyq bilim berý mekemesinde, sonyń ishinde balabaqshalarda tehnıkalyq tekserý quraldaryn mindetti túrde engizý týraly talap belgileý mańyzdy. Sondaı-aq bilim berý mekemeleri ornalasqan aýdandardy patrýldeýdi kúsheıtý kerek, — dedi depýtat.

Budan buryn habarlanǵandaı, elimizde Kúzet qyzmetin baqylaıtyn arnaıy memlekettik organ quryldy.