Mektepter nelikten kórkem ádebı kitaptarǵa suranys bermeıdi – mınıstr másele kóterdi
NUR-SULTAN. QazAqparat – Bilim jáne ǵylym mınıstri Ashat Aımaǵambetov mektepterdiń kórkem ádebı kitaptarǵa suranys bermeıtinine alańdaýshylyq bildirdi, dep habarlaıdy QazAqparat tilshisi.
«Bizde oqýlyqtarǵa tapsyrys berý jaǵynan problema bar. Mektep oqýlyq kólemi boıynsha bir suranys, al bilim basqarmasy nemese bólimi ekinshi kólem boıynsha suranys joldaıdy. Sebep túsiniksiz. Bálkim bul baǵytta Sholpan Tańatqyzy (vıtse-mınıstr Qarınova) arnaıy monıtorıng tobymen máseleni baqylaýǵa alý kerek bolar. Táýekelder kóp», - dedi Ashat Aımaǵambetov Bilim jáne ǵylym mınıstrliginiń apparattyq otyrysynda.
Mınıstr sonymen qatar mektepterdiń kórkem ádebıetke suranys bermeıtinin aıtyp qaldy.
«Biz balalardyń oqýǵa, kitapqa, ádebıetke degen mahabbatyn oıatqymyz keledi. Biraq oqý oryndary men mektepter kórkem ádebı kitaptardy alǵysy da kelmeıdi. Kerek deseńiz, qazir tıisti ádebı kitaptardyń qory da qalmaı barady. Sol sebepti bul máseleni de nazarǵa alaıyq», - dedi Ashat Aımaǵambetov.
Eske sala ketsek, buǵan deıin Ashat Aımaǵambetov mektepterge oqýlyq jetkizýge qatysty jyl saıyn qaıtalanatyn problemany kótergen bolatyn.
«Jyl saıyn bizde oqýlyqtardy jetkizý (mektepterge) boıynsha problema týyndaıdy. Sol sebepti osy jyldyń 31 naýryzyna deıin oqýlyqtardy jetkizý boıynsha memlekettik satyp alý jumysyn aıaqtaýdy tapsyramyn. Ádettegideı, shilde nemese tamyz aılaryna deıin kútýdiń qajeti joq. Olaı etsek, jyl saıyn osy problemamen betpe-bet kele beremiz. Bul jumysty 31 naýryzǵa deıin atqarýǵa eshteńe kedergi keltirip turǵan joq», - dedi ol.
