Mektepter men balabaqshalarǵa jańa sanıtarlyq talaptar engiziledi
ASTANA. KAZINFORM — 2025-2026 jyldardyń jańa epıdemııalyq maýsymyna daıyndyq jóninde QR Bas memlekettik sanıtarııalyq dárigeriniń qaýlysy qabyldandy, dep habarlaıdy Sanıtarııalyq-epıdemıologııalyq baqylaý komıteti.
Qaýly 2025–2026 jyldardaǵy JRVI, tumaý jáne COVID-19 boıynsha epıdemııalyq maýsym kezeńinde sanıtarııalyq-epıdemııaǵa qarsy, sanıtarııalyq-profılaktıkalyq is-sharalardy ótkizýdi kózdeıdi.
Onyń ishinde:
- aǵymdaǵy jylǵy 15 qyrkúıekten bastap tumaýǵa qarsy vaktsınatsııa júrgizý;
- medıtsınalyq uıymdarda kire beriste «súzgilerdiń» jumysyn qamtamasyz etý, maskalardy paıdalaný, antıseptıkterdiń bolýy;
- JRVI, tumaý jáne COVID-19 belgileri bar júkti áıelder men 1 jasqa deıingi balalarǵa úıde shaqyrýǵa birinshi kezekte qyzmet kórsetý;
- balabaqshalarda kúndelikti tańerteńgi súzgini júrgizý, JRVI jáne tumaý belgileri bar balalardy shettetý;
Sonymen qatar orta bilim berý uıymdarynda bir synyptaǵy oqýshylardyń 20–30%-y bir ınkýbatsııalyq kezeń ishinde JRVI-men aýyrǵan jaǵdaıda, jalpy bilim beretin uıymdarda kabınettik oqytý júıesi joıylady jáne kúntizbelik 10 kún ishinde jańa balalardy synyptarǵa qabyldaýǵa tyıym salynady.
— Bir ınkýbatsııalyq kezeń ishinde oqýshylardyń jalpy sanynyń 30%-y jáne odan kóbi JRVI-men aýyrǵan jaǵdaıda, oqýshylar onlaın oqytýǵa kóshiriledi, — delingen komıtet taratqan aqparatta.
Osy qaýlynyń tolyq mátinimen siltemege ótip tanysýǵa bolady.