Mektepter men balabaqshalar arasynda ótken ekologııalyq marafon jeńimpazdary anyqtaldy
QARAǴANDY. QazAqparat – «EkoAsar – ıgi ister marafony» respýblıkalyq aktsııasyna Qaraǵandy men Temirtaý qalalary belsendi túrde qoldaý kórsetti. Mektep oqýshylary men balabaqsha tárbıelenýshileri makýlatýra men plastık jınap, ekologııalyq mádenıetti úlgi retinde nasıhattady. Bul úshin marafonǵa qatysýshylar marapattarǵa ıe boldy, dep habarlaıdy QazAqparat tilshisi.
Nur-Sultanda ekologııalyq marafonnyń qorytyndysy shyǵaryldy. Jobanyń uıymdastyrýshylary — Ekologııa, geologııa jáne tabıǵı resýrstar mınıstrligi, ÓMK operatory, «Jas Ulan» Respýblıkalyq qoǵamdyq birlestigi.
Birinshi oryndy Qaraǵandy qalasynyń №45 mektep-gımnazııasy men «Tilek» bóbekjaıy; Temirtaý qalasynyń №16 mektebi men «Altynaı» bóbekjaıy aldy. Ekinshi orynda – Qaraǵandy qalasynyń №15 mektebi jáne «Ertegi» bóbekjaıy. Úshinshi oryn Qaraǵandy qalasynyń №59 mektebine buıyrdy.
«Biz ekochellendjderge birinshi ret qatysyp otyrǵan joqpyz. Bizde «Eko-mektep» jobasy jumys isteıdi. Ekologııalyq marafondy barlyq synyp oqýshylary ǵana emes, ata-analar da qoldady. Tómengi synyp oqýshylary 850 kg makýlatýra jınady. Joǵary synyp oqýshylary qoqysty bólek jınaý týraly beınerolıkter túsirdi. Ekomaterıaldardan qolóner buıymdary jasaldy. Muǵalimder synyp saǵattaryn ótkizdi, onda qaldyqtardy bólek jınaý men qaıta óńdeýdiń mańyzdylyǵy týraly aıtyldy», – dedi Qaraǵandy qalasynyń №45 gımnazııasy dırektorynyń tárbıe isi jónindegi orynbasary Irına Deeva.
Balabaqsha muǵalimderi men tárbıeshileri úshin onlaın-trenıngter ótkizildi. Alynǵan bilim olarǵa ekotrener bolýǵa múmkindik beredi.
Qaıta óńdeletin shıkizatty tapsyrýdan túsken qarajat qaıyrymdylyq pen áleýmettik jobalarǵa jumsalady.
