Mektepter qurylysyndaǵy zańsyzdyq boıynsha 22 laýazymdy tulǵa tártiptik jaýapkershilikke tartylyp, 6 qylmystyq is qozǵaldy
ASTANA. 23 qazan. QazAqparat - Búgin Bas Prokýror Ashat Daýylbaevtyń tóraǵalyq etýimen Bas prokýratýranyń alqa májilisi bolyp ótti.
Onda mektepterdiń qurylysyn júrgizý, sondaı-aq sheteldik jumys kúshin tartý barysyndaǵy jergilikti atqarýshy organdar qyzmetindegi zańdylyqtyń saqtalýy máseleleri qaraldy. Bul týraly Bas prokýratýranyń baspasóz qyzmetinen habarlandy.
Aqparatqa sáıkes, Bas prokýratýranyń tekserýi barysynda anyqtalǵan quqyq buzýshylyqtardyń arasynda eń kóp taralǵandary mynalar boldy: qurylys-montajdyq jumystaryn jobalyq-smetalyq qujattamalardan aýytqyp júrgizý, qurylys normalary men tehnologııalaryn buzý, qaýipsiz emes qurylys materıaldaryn, sondaı-aq metrologııa organdarynda tekserýden ótpegen ólshem quraldaryn paıdalaný. Onyń ishinde respýblıkada qurylysy júrip jatqan 165 jalpy bilim berý mektepteriniń tórtten bir bóliginiń merzimi buzylyp salynyp jatqany anyqtalǵan. Jınalysta atalyp kórsetilgendeı, kóbinese qalyptasyp otyrǵan jaǵdaı qurylysqa teris pıǵyldy qurylysshylardy jiberetin jáne oryndalmaǵan jumystardyń aktilerine qol qoıatyn sheneýnikterdiń jaýapkershiliksiz qatynasynyń saldarynan bolyp otyr.
«Tekserý nátıjesi boıynsha 22 laýazymdy tulǵa tártiptik jaýapkershilikke tartyldy, 6 qylmystyq is qozǵaldy, 5 materıal tergeýge deıingi tekserý júrgizý úshin qarjy polıtsııasyna joldandy. Talqylaý qorytyndysy boıynsha ýákiletti organdar basshylaryna anyqtalǵan buzýshylyqtardy joıý jáne balalardyń yńǵaıly jáne qaýipsiz bilim alý quqyqtarynyń múltiksiz saqtalýyn qamtamasyz etý boıynsha tıimdi uıymdastyrýshylyq-praktıkalyq sharalar keshenin qabyldaý jónindegi mindetter qoıyldy», - delingen baspasóz habarlamasynda.
Prokýrorlarǵa qurylys salasyndaǵy qadaǵalaý tıimdiligin arttyrý, barlyq zańdylyqty buzýshylyqtardy joıýǵa jáne kináli tulǵalardy jaýapkershilikke tartýǵa qatań baqylaýdy qamtamasyz etý tapsyrylǵan.
Budan bólek, halyqtyń eńbekpen qamtylýy salasyndaǵy zańdylyqtyń jaı-kúıin taldaý qazaqstandyq eńbek naryǵyna sheteldik jumys kúshiniń belsendi túrde enýin, sonymen qatar sheteldik jumys kúshin paıdalaný tártibin saqtaý jónindegi ýákiletti organdar tarapynan tıisti baqylaýdyń bolmaýyn kýálandyrady. Jergilikti atqarýshy organdardyń jol berýi saldarynan sheteldik azamattardy tartýǵa ruqsat berý tártibin buzý, ruqsat alý úshin kórineý jalǵan qujattardy paıdalaný, sáıkes biliktiligi joq sheteldik jumysshylardy tartý faktileri oryn alǵan. Qazaqstandyq zańnamalar talaptaryn jappaı eskermeý, qazaqstandyq jumysshylar quqyqtaryn dıskrımınatsııalaý faktilerine jol beriledi.
«Júrgizilgen tekserýler nátıjeleri boıynsha prokýratýra organdary 11 qylmystyq is qozǵady, 2230 tulǵa ákimshilik jaýapkershilikke tartyldy. Sheteldik jumys kúshterin tartýǵa 1396 ruqsat qaıtaryp alyndy jáne 271 ruqsattyń áreket etýi toqtatyldy, elimizden 238 sheteldik azamat shyǵaryldy. Jınalys qorytyndysy boıynsha Úkimetke zańdylyqty buzýshylyqtardy joıý, elimizge sheteldik jumys kúshterin tartý tártibin retteıtin zańnamalardy qoldanýdyń tıimdiligin arttyrý týraly usynys engizý týraly sheshim qabyldandy», - delingen baspasóz habarlamasynda.
